Жомбой туманининг Катта қишлоқ маҳалласи Узуновул массивида 72 оилага мўлжалланган яна учта кўп қаватли уй қад ростлади. Айни пайтда «Бунёдкор шижоат қурувчи», «Афсона омад таъмир қурилиш» каби пудрат корхоналари томонидан сўнгги таъмирлаш ишлари олиб борилмоқда. Бу ҳақда «Жомбой тонги» хабар бермоқда деб ёзади Zarnews.
Тумандаги «Узуновул», «Бешбола», «Эски Жомбой» массивлари ҳам «Обод қишлоқ» дастурига киритилган. «Бешбола» маҳалласида сентябрь ойига қадар 14 та 2 сотихлик (3 хонали) турар жой биноларини қуриб-битказиш режалаштирилган.
Туман ҳокими Умиджон Назаров мутахассислар билан мазкур қурилиш объектларида бўлиб, таъмирлаш ишларини кўздан кечирган.
– «Тендерда қатнашиб, саккизта уйни қуриш мажбуриятини олгандик. Айни пайтда асосий қурилиш ишлари якунига етди. Яқинда эшик-ромлар ҳам ўрнатилади. Бунинг учун жами 1 миллиард 200 миллион сўм сарф бўляпти. Ҳозирча, 450 миллион сўмга яқин маблағ ҳисоб рақамимизга келиб тушди. Вилоят инжиниринг компанияси қолган маблағни ҳам ажратиб берса, ходимларнинг иш ҳақини вақтида тўлаш имкони бўларди», — дейди «Бунёдкор файз меъмор» корхонаси раҳбари Юсуф Абданов.
Бундан ташқари ҳудудга қарашли 51-умумтаълим мактаби капитал таъмирланаётган бўлса, 25-сонли МТМ, «Низамат Эсонтурдиев» қишлоқ врачлик пункти бинолари янгидан барпо этиляпти.
Изоҳ (0)