Нашримизда 17 июль куни чоп этилган «Самарқанд шаҳрида меҳнат инспекторлари мажбурий меҳнатга жалб этилди» номли материал бўйича Бандлик ва меҳнат муносабатлари вазири ўринбосари раҳбарлигидаги ишчи гуруҳ томонидан шаҳар аҳоли бандлигига кўмаклашиш марказида хизмат текшируви ўтказилди.
Вазирлик матбуот хизматига кўра, мақолада келтирилган ҳолатлар қисман ўз тасдиғини топди. Жумладан, Самарқанд шаҳар аҳоли бандлигига кўмаклашиш маркази мутасадди ходимлари томонидан Вазирлар Маҳкамасининг «Ўзбекистон Республикаси Бандлик ва меҳнат муносабатлари вазирлиги ҳузуридаги жамоат ишлари жамғармаси фаолиятини ташкил этиш тўғрисида»ги қарори талабларига риоя қилинмаганлиги ва ижроси таъминланмаганлиги маълум бўлди.
Хизмат текшируви натижалари 20 июль куни ушбу марказда муҳокама қилинди. Йиғилишда Бандлик ва меҳнат муносабатлари вазири Шерзод Кудбиев, вазир ўринбосарлари, ишчи гуруҳи аъзолари, вилоят Бандлик бош бошқармаси ва шаҳар аҳоли бандлигига кўмаклашиш маркази ходимлари иштирок этди.
Хизмат текшируви натижасига кўра, вилоят Бандлик бош бошқармаси бошлиғига «ҳайфсан» жазоси тайинланиши, вилоят давлат меҳнат инспексияси бошлиғи, унинг ўринбосари, шаҳар Аҳоли бандлигига кўмаклашиш маркази директори, Давлат меҳнат ҳуқуқ инспектори, ҳақ тўланадиган жамоат ишлари бўйича шў’ба бошлиғи эгаллаб турган лавозимидан озод этилиши тўғрисида қарор қабул қилинди.
Изоҳ (0)