«Ўзбекистон почтаси» АЖнинг Самарқанддаги филиали ходимлари молиявий фирибгарлик ишлари билан шуғуллангани маълум бўлди. Улар тўққиз ой давомида 575 миллион сўмни ўзлаштиришга улгурган, деб хабар беради «Jahon.uz».
Азиза Ҳақбердиева, Анора Ражабова ва Лола Ҳамидова алимент ва пул ўтказмалари билан шуғулланган. 2018 йилнинг 1 январидан 25 сентябрига қадар уларнинг филиали орқали 3 миллиард 138 миллион сўм ўтказилган бўлиб, ходимлар пулларнинг маълум бир қисмини ўзлаштириб олган.
Самарқанд вилояти прокуратураси аёлларга нисбатан жиноят иши очди. Суд қарорига кўра улар Жиноят кодексининг 167- (Ўзлаштириш ёки растрата йўли билан талон-торож қилиш) ва 228-(Ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) моддалари бўйича айбдор деб топилган.
Азиза Ҳабердиева ва Анора Ражабова 5 йил-у 2 ой муддатга, Лола Ҳамидова эса 5 йил-у 1 ой муддатга озодликдан маҳрум этилди. Шунингдек, улар «Ўзбекистон почтаси» филиалига етказилган 575 миллион сўм зарарни ҳам қоблаб бериши керак.
Бундан ташқари мазкур филиалнинг яна уч нафар ходими фирибгарликка алоқадор бўлиб, молиявий жиноятларни содир этишда айбдор деб топилди ва уларга нисбатан тегишли жазо тайинланди.
Изоҳ (0)