Сўнгги беш йил мобайнида Ўзбекистонда жазони ижро этиш муассасаларидан (ЖИЭМ) қочиш жинояти содир этилмаган. Бу ҳақда 17 июль куни ИИВ Жазони ижро этиш бош бошқармаси вакили журналистлар билан бўлиб ўтган очиқ мулоқотда маълум қилди, дея хабар бермоқда «Дарё» мухбири Мусулмонбек Иброҳимов.
Анжуманда ИИВ Жазони ижро этиш бош бошқармаси Тарбиявий ва ижтимоий-психологик ишларни ташкил этиш бошқармаси бошлиғи Жамшид Султонов Ўзбекистон ЖИЭМдан қочиш жинояти содир этилиши юзасидан ахборот берди.
«Ўзбекистонда ЖИЭМдан қочиш билан боғлиқ жиноятларни маълум қилиш бошқа турдаги жиноятлар каби сир эмас. Маълумотлар очиқ тақдим этилади. Сўнгги беш йилда жазони ижро этиш колонияларидан бирорта ҳам қочиш жинояти содир этилмади. Мабодо қочиш жинояти содир этилган тақдирда Ички ишлар вазирлигининг ҳуқуқий-меъёрий буйруқлари бўйича чора-тадбирлар ишлаб чиқилади. Бу ҳақда аҳоли хабардор қилинади», — деди Султонов.
Шунингдек, Жазони ижро этиш бош бошқармаси вакили Султонов ЖИЭМга неча нафар психолог штат бирлиги ажратилиши юзасидан ҳам маълумот берди.
«Жазони ижро этиш муассасаларининг ҳаммасида психологлар фаолият юритмоқда. Психологлар штат бирлиги жазо муддатини ўтаётган маҳкумлар сонига эмас, ЖИЭМнинг ҳар биттасига бир нафардан ажратилган. Шундай турдаги ЖИЭМ борки, у ер ҳам қаттиқ тартибли муассаса, шу билан бирга, турма фаолияти ҳам мавжуд. Уларнинг иккисига ҳам алоҳида психолог штати ажратилади. Бундан ташқари, сақланаётган маҳкумларнинг жазо туридан келиб чиқиб, учтагача штат бирлиги берилган ЖИЭМ ҳам бор», — деди у.
Изоҳ (0)