Ўзбекистон Хотин-қизлар қўмитаси раиси ўринбосари Мукаррам Нурматова Андижондаги «кўзбўямачилик» ҳақида ОАВда тарқалган хабарларни рад этди. Бу ҳақда Ўзбекистон Хотин-қизлар қўмитаси вакиллари журналистлар билан бўлиб ўтган мулоқотда айтиб ўтди, дея хабар бермоқда «Дарё» мухбири Мусулмонбек Иброҳимов.
Эслатиб ўтамиз, Андижон шаҳрида ижтимоий ҳимояга муҳтож бир неча аёлларга коттеж бериш шарти билан «Мустақиллик тикувчилик мажмуаси»га ишга қабул қилингани, 2019 йилнинг февраль—март ойларида вилоят ҳокимлиги масъули корхонанинг уй-жойга муҳтож олти нафар ишчисига янги қурилаётган коттежлардан совға сифатида биттадан берилишини маълум қилгани, уларнинг бепул коттеж олгани тўғрисида «Ўзбекистон 24» телеканалида лавҳа ҳам эфирга узатилгани ҳақида аввал хабар берилган эди.
Президент Шавкат Мирзиёевнинг Андижонга ташрифи вақтида ишчилардан фақат бир нафарига коттеж совға қилинган. Ташрифдан сўнг вилоят ҳокимлиги масъули талабига кўра, қолган беш нафар ишчи янги қурилаётган тўрт қаватли уйлардан хонадон ажратиш ваъда қилинган ҳолда коттежлардан кўчирилган. Буни ўрганиб чиққан Бош прокуратура вилоят ҳокимлиги мутасаддилари беш нафар аёлга коттеж берилишини ваъда қилиб, якунда уларга коттеж ажратмасдан, кўзбўямачилик қилганини аниқлаган.
Ахборот ва оммавий коммуникациялар агентлигида ўтган анжуманда Ўзбекистон Хотин-қизлар қўмитаси раҳбарияти Андижондаги «кўзбўямачилик» бўйича нима учун изоҳ бермагани сўралди.
Бунга жавобан Ўзбекистон Хотин-қизлар қўмитаси раиси ўринбосари Мукаррам Нурматова «кўзбўямачилик» ҳақида тарқатилган маълумотлар нотўғрилигини айтиб ўтди.
«Ушбу масала ҳақида журналистлар томонидан тарқатилган дастлабки маълумотлардан кейин биз бунга катта эътибор бермадик. Чунки, бу тўғри маълумот эмас эди. Шахсан ўзим ўша аёллар билан учрашганман. Президент ташрифидан олдин Андижонда яхши ташаббус билан чиқилганди. Айнан талаблар билан (‘кўзбўямачилик’да алданган аёллар — таҳр.) чиққан аёлларга Хотин-қизлар қўматаси томонидан жуда катта янгича ёндашув асосида: жазо муддатини ўтаб чиққан, жиноятчиликка мойиллиги бор ва ахлоқи яхши бўлмаган аёлларни цехларга жойлаштириб, ишлаб топган пуллари орқали уй-жойлар ажратиш режалаштирган. Аёлларга кўп қаватли уй қурилаётганидан хабарим бор эди. Уйларни бориб кўрганман, жуда ҳам катта имкониятлар, шароитлар яратилган. Шунинг учун, биз масалани икки томондан ўрганиб ҳал қиламиз. Ўша вақтда масала чуқурлашиб кетмасин, ўз-ўзидан вилоят миқёсида ҳал бўлади, деган мақсадда алоҳида жавоб бермаган эдик. Андижонда жуда катта иш қилинган, одамлар ўз кўзи билан кўриб турибди-ку, халқ ўз баҳосини беради, деган мақсадда бу масалани чуқурлаштирмаган эдик», — деди Мукаррам Нурматова.
Ўзбекистон хотин-қизлар қўмитаси раиси Элмира Боситхонова Андижон вилояти хотин-қизлар қўмитаси раиси гапини уйга муҳтож аёллар нотўғри тушунганини таъкидлади.
«Ҳоким ўринбосари (Андижон вилояти хотин-қизлар қўмитаси раиси Манзура Юнусова — таҳр.) аёлларни ишга жалб қилаётганда ‘ишлаб кредитни тўлашга имкониятинглар бўлганда мана шу уйлардан сизлар ҳам оласизлар’ деган гапини у аёллар ‘менга шу ердан уй берар экан’, деб қабул қилган. Бу ерда тушунмовчилик бўлган. Ҳоким ўринбосари Манзура Фазлиддиновна билан гаплашдик: Хотин-қизлар қўмитаси фондидаги пулдан ‘менга уй’, деганларнинг ҳаммасига тарқатмасдан, рўйхат ва тартиб билан тақсимланишини эътиборга олган. Лекин у ерда тартиблар жуда ҳам мураккаб. Бизни прокуратура текширади, кимга уй бериш бўйича қоғозга мен имзо чекишим керак. Буларнининг ҳаммаси таҳлил қилиниши лозим», — деди Боситхонова.
Андижон вилоят хотин-қизлар қўмитаси раиси Манзура Юнусова «Газета.uz»га берган интервюсида аёллар алданганини тан олган ва барча келтирилган маълумотларни тасдиқлаган. Фақат бу алдов яхши ниятда яъни аёлларни янада кўпроқ ишлашга руҳлантириш учун айтилганини қўшимча қилган.
Изоҳ (0)