So‘nggi besh yil mobaynida O‘zbekistonda jazoni ijro etish muassasalaridan (JIEM) qochish jinoyati sodir etilmagan. Bu haqda 17-iyul kuni IIV Jazoni ijro etish bosh boshqarmasi vakili jurnalistlar bilan bo‘lib o‘tgan ochiq muloqotda ma’lum qildi, deya xabar bermoqda “Daryo” muxbiri Musulmonbek Ibrohimov.
Anjumanda IIV Jazoni ijro etish bosh boshqarmasi Tarbiyaviy va ijtimoiy-psixologik ishlarni tashkil etish boshqarmasi boshlig‘i Jamshid Sultonov O‘zbekiston JIEMdan qochish jinoyati sodir etilishi yuzasidan axborot berdi.
“O‘zbekistonda JIEMdan qochish bilan bog‘liq jinoyatlarni ma’lum qilish boshqa turdagi jinoyatlar kabi sir emas. Ma’lumotlar ochiq taqdim etiladi. So‘nggi besh yilda jazoni ijro etish koloniyalaridan birorta ham qochish jinoyati sodir etilmadi. Mabodo qochish jinoyati sodir etilgan taqdirda Ichki ishlar vazirligining huquqiy-me’yoriy buyruqlari bo‘yicha chora-tadbirlar ishlab chiqiladi. Bu haqda aholi xabardor qilinadi”, — dedi Sultonov.
Shuningdek, Jazoni ijro etish bosh boshqarmasi vakili Sultonov JIEMga necha nafar psixolog shtat birligi ajratilishi yuzasidan ham ma’lumot berdi.
“Jazoni ijro etish muassasalarining hammasida psixologlar faoliyat yuritmoqda. Psixologlar shtat birligi jazo muddatini o‘tayotgan mahkumlar soniga emas, JIEMning har bittasiga bir nafardan ajratilgan. Shunday turdagi JIEM borki, u yer ham qattiq tartibli muassasa, shu bilan birga, turma faoliyati ham mavjud. Ularning ikkisiga ham alohida psixolog shtati ajratiladi. Bundan tashqari, saqlanayotgan mahkumlarning jazo turidan kelib chiqib, uchtagacha shtat birligi berilgan JIEM ham bor”, — dedi u.
Izoh (0)