17 июль, чоршанба куни Ўзбекистон Миллий олимпия қўмитаси мажлислар залида қўмитанинг навбатдан ташқари XXXVI Бош Ассамблея йиғилиши ўтказилди. Бу ҳақда ташкилот расмий сайтида хабар берилди.
Мазкур йиғилишда Миллий олимпия қўмитаси бош котиби лавозимида ишлаб келган Жасур Матчановнинг ўз хоҳишига кўра ёзган аризаси кўриб чиқилди. Бош Ассамблея аъзолари Матчановнинг истеъфосини бир овоздан маъқуллади ва у ўз лавозимидан озод этилди.
Таъкидлаш жоиз, Ўзбекистонда хизмат кўрсатган спортчи, бокс бўйича жаҳон чемпионати ва Осиё ўйинлари совриндори Жасур Матчанов Миллий олимпия қўмитасида 2018 йилнинг 16 январидан буён Бош котиб лавозимида фаолият юритиб келаётганди.
Ўз навбатида, Миллий олимпия қўмитаси бош котиб лавозимига номзодларни кўриб чиқмоқда. Номзодлар кўриб чиқилгач, МОҚнинг навбатдаги Бош Ассамблея йиғилишида ташкилотга янги бош котиб сайланади.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)