17-iyul, chorshanba kuni O‘zbekiston Milliy olimpiya qo‘mitasi majlislar zalida qo‘mitaning navbatdan tashqari XXXVI Bosh Assambleya yig‘ilishi o‘tkazildi. Bu haqda tashkilot rasmiy saytida xabar berildi.
Mazkur yig‘ilishda Milliy olimpiya qo‘mitasi bosh kotibi lavozimida ishlab kelgan Jasur Matchanovning o‘z xohishiga ko‘ra yozgan arizasi ko‘rib chiqildi. Bosh Assambleya a’zolari Matchanovning iste’fosini bir ovozdan ma’qulladi va u o‘z lavozimidan ozod etildi.
Ta’kidlash joiz, O‘zbekistonda xizmat ko‘rsatgan sportchi, boks bo‘yicha jahon chempionati va Osiyo o‘yinlari sovrindori Jasur Matchanov Milliy olimpiya qo‘mitasida 2018-yilning 16-yanvaridan buyon Bosh kotib lavozimida faoliyat yuritib kelayotgandi.
O‘z navbatida, Milliy olimpiya qo‘mitasi bosh kotib lavozimiga nomzodlarni ko‘rib chiqmoqda. Nomzodlar ko‘rib chiqilgach, MOQning navbatdagi Bosh Assambleya yig‘ilishida tashkilotga yangi bosh kotib saylanadi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @daryo_sport’ga obuna bo‘ling!
Izoh (0)