Хотин-қизлар қўмитаси раиси Элмира Боситхонова иштирок этган 11 июлдаги брифингда зўравонликдан жабр чеккан хотин-қизларга кўмак бериш, зўравонликни олдини олиш масаласи муҳокама қилинган эди.
Хотин-қизлар қўмитасидан маълум қилишларича, брифингда Тошкентдаги бозорлардан бирида ишлаётган 30 нафар сотувчи аёл уларга муносиб жой берилмаётгани, офтобда қийналиб савдо қилаётгани, атрофдагилар ва баъзи масъуллардан ҳақорат эшитаётгани юзасидан қўмитага мурожаат этгани мисол тариқасида келтирилиб, шу аёлларга «бозорчи» сўзини ҳақорат оҳангида айтаётган масъулларни, атрофдагиларни муносабатини ўзгартириш мақсадида бозорга маърифат олиб кириш ғояси маълум қилинган эди.
«Кўриниб турибдики, ижтимоий тармоқларда ‘бозорчи‘ ва ‘бозорда маърифат йўқ’ деган фикрлар умумий фикрдан узиб олиниб, нотўғри талқин қилинмоқда. Қолаверса, талқинларда ва муносабат билдиришда инсон ва ташкилот шаънига ҳақоратли сўзлар айтилаётганини инобатга олиб, ижтимоий тармоқларда фикр билдиришнинг ҳам ўз қоидалари борлигини эслатмоқчимиз.Хотин-қизлар қўмитаси блогерларимиз томонидан очиқ хат ва муносабат шаклида куюнчаклик билан ёзилаётган бозордаги аёлларнинг шароити оғирлиги, уларга кўмак зарурлиги билан боғлиқ барча ҳолатлардан яхши хабардор.
Шу боис блогерларимиз негадир эсга олмаган аёллар ҳаётини яхшилаш борасидаги бир қанча йўналишлар қатори, бозорларда миллий қадриятларимиз ва улуғ санъатимиз, адабиётимиз намуналарини радиоузеллар орқали ўқиб-эшиттириш, кутубхоналар ташкил этиш ҳамда Хотин-қизлар қўмитасининг бошланғич ташкилотини тузиш орқали ўша сотувчи аёлларнинг ҳақ-ҳуқуқларини ҳимоялаш, уларни муносиб шароитларда ишлашини таъминлаш позициясини амалга оширишда давомли эканини маълум қиламиз», — дейилади қўмита маълумотида.
Изоҳ (0)