Маълумки, 2019 йил 1 январь санасидан бошлаб Ўзбекистон фуқароларига 10 йил муддатга, вояга етмаганларга 5 йил муддатга хорижга чиқиш биометрик паспортлари берилиши йўлга қўйилган ва шу муносабат билан Самарқанд вилояти ИИБ Миграция ва фуқароликни расмийлаштириш бошқармасида (М ва ФРБ) ҳам хорижга чиқиш паспортлари расмийлаштиришга мўлжалланган икки ускуна ўрнатилиб, Самарқанд вилояти фуқароларига хизмат кўрсатилиб келаётган эди.
Ўшанда хорижга чиқиш паспорти расмийлаштириш учун кўп фуқаролар мурожаат қилгани сабабли вилоят ИИБ М ва ФРБда ва унинг тўрт ҳудудий бўлинмасида кунлик навбатлар кўпайиб, фуқароларнинг ортиқча вақти сарфланишига сабаб бўлгани кузатилган эди. Биз январь ойи охирида аҳоли мурожаатлари бўйича М ва ФРБга ташриф буюриб, ҳолатни ўрганган эдик.
Ўшандан кейин, орадан бироз ўтиб, М ва ФРБ хорижга чиқиш паспортини олишга талабгорлар навбатларини бироз камайтириш учун Тайлоқ туманида Тайлоқ ва Ургут туманлари аҳолисига хизмат кўрсатиш учун аппарат ўрнатилганини хабар қилган эди.
Аммо хорижга чиқиш паспортини олувчилар сонининг кўплиги учун бу ҳам навбатларни бартараф этмади. Ўшанда вилоят М ва ФРБ бошлиғи Даврон Норчаев йилнинг иккинчи ярмида яна бир неча туманда ускуналар ўрнатилишини маълум қилган эди.
Биз шу масала юзасидан яна идорага ташриф буюриб, йил бошида белгиланган вазифа қай даражада бажарилгани билан қизиқдик.
Даврон Норчаевнинг маълум қилишича, ИИБ ва у бошчилик қилаётган бошқарма йил бошида белгиланган вазифаларни ўз вақтида бажариш устида ишлаяпти. Шу муносабат билан ҳозирги вақтда билан яна бешта қўшимча хорижга чиқиш паспорти расмийлаштириш ускуналари олиб келиниб, Самарқанд ва Каттақўрғон шаҳарларида, Ургут, Тайлоқ, Паяриқ ва Самарқанд туманларида ўрнатилди.
Ўрнатилган ускуналар бўйича тақсимот ҳозирча қўйидагича белгиланган: Паяриқ туманида ўрнатилган ускуна Паяриқ, Иштихон, Қўшработ ва Оқдарё туманлари, Каттақўрғон шаҳридаги ускуна Каттақўрғон шаҳри, Каттақўрғон, Нарпай ва Пахтачи туманлари, Тайлоқ туманидагиси Тайлоқ, Самарқанд, Жомбой ва Булунғур туманлари ҳамда Ургут туманидагиси Ургут тумани, Самарқанд шаҳрида ўрнатилган ускуна Самарқанд шаҳри, Самарқанд вилояти ИИБ М ва ФРБдаги ускуна эса Самарқанд шаҳри, Пастдарғом ва Нуробод туманлари аҳолисига хизмат кўрсатади.
«Шу муносабат билан Самарқанд вилоят ИИБ М ва ФРБ вилоят аҳолисини хорижга чиқиш паспорти расмийлаштириш учун юқорида кўрсатилган туманлардаги ИИБ М ва ФРБларга мурожаат қилишларини сўраймиз», – деди Норчаев биз билан суҳбатда.
Шунингдек, Норчаевнинг сўзларига кўра, яқин вақтларда вилоятнинг ҳар бир туманида хорижга чиқиш паспортлари бериладиган ускуналар ўрнатилиши режалаштирилмоқда.
Ҳозирги кунда мавжуд навбатларни якунига етказиш ва аҳолига янада қулайлик яратиш учун вилоят ИИБ М ва ФРБ ҳамда унинг қуйи тизимларида шанба ва якшанба кунлари ҳам иш куни сифатида фаолият кўрсатилиши белгиланган.
Соҳага тегишли яна бир янгилик – энди хорижга чиқиш паспортини олмоқчи бўлганлар олдингидай иш жойидан ва маҳалладан маълумотнома олиш ва анкета тўлдириш учун овора бўлиб юрмайди. Энди вилоят ва туманлардаги ИИБ М ва ФРБга фақат паспортнинг ўзини олиб келсалар етарли бўлади. Анкета бўлимларнинг ўзида электрон тарзда тўлдирилади.
Шу билан бирга, вилоят М ва ФРБ аҳолини хорижга чиқиш паспортини расмийлаштириш юзасидан вужудга келадиган тушунмовчиликлар бўйича қуйидаги телефон рақамлари оркали мурожаат қилиши мумкинлигини маълум қилди:
Самарқанд вилоят ИИБ М ва ФРБ бошлиғи Норчаев Даврон Очилович: (366) 223-50-26, (97) 484-26-47;
Самарқанд вилоят ИИБ М ва ФРБ бўлим бошлиғи Мўминов Шероз: (93) 353-03-30.
Эслатиб ўтамиз, хорижга чиқиш учун алоҳида паспорт мамлакат Президентининг 2017 йил 16 августдаги «Ўзбекистон Республикаси фуқароларининг хорижга чиқиш тартибини такомиллаштиришга доир муҳим чора-тадбирлар тўғрисида»ги фармони асосида 2019 йил 1 январидан бошлаб жорий этилган.
Янги тартиб бўйича, Ўзбекистон фуқароси хорижга чиқиш учун биометрик паспортга эга бўлиши ҳамда ушбу паспорт Вазирлар Маҳкамаси ҳузуридаги Давлат персоналлаштириш маркази томонидан 10 иш куни давомида тайёрланиб бериши белгиланган.
Шунингдек, фуқаролар энди хорижга чиқиш паспортини олиш учун иш жойи, ўқиш маскани ёки ҳудудий ўзини ўзи бошқариш органи томонидан муҳр билан тасдиқланган ариза-анкета тайёрлаб бориши бекор қилинган ва энди фуқаро фақатгина паспорти билан боради ҳамда энг кам иш ҳақининг 120 фоизи миқдоридаги (вояга етмаганлар учун ЭКИҲнинг 80 фоизи миқдорида) давлат божи тўлайди.
Хорижга чиқиш учун биометрик паспорт 1 ёшгача бўлган болаларга 2 йил, вояга етмаган болаларга 5 йил, вояга етган фуқароларга 10 йил муддатга берилади.
Ғайрат Йўлдош тайёрлади.
Изоҳ (0)