Ma’lumki, 2019-yil 1-yanvar sanasidan boshlab O‘zbekiston fuqarolariga 10 yil muddatga, voyaga yetmaganlarga 5 yil muddatga xorijga chiqish biometrik pasportlari berilishi yo‘lga qo‘yilgan va shu munosabat bilan Samarqand viloyati IIB Migratsiya va fuqarolikni rasmiylashtirish boshqarmasida (M va FRB) ham xorijga chiqish pasportlari rasmiylashtirishga mo‘ljallangan ikki uskuna o‘rnatilib, Samarqand viloyati fuqarolariga xizmat ko‘rsatilib kelayotgan edi.
O‘shanda xorijga chiqish pasporti rasmiylashtirish uchun ko‘p fuqarolar murojaat qilgani sababli viloyat IIB M va FRBda va uning to‘rt hududiy bo‘linmasida kunlik navbatlar ko‘payib, fuqarolarning ortiqcha vaqti sarflanishiga sabab bo‘lgani kuzatilgan edi. Biz yanvar oyi oxirida aholi murojaatlari bo‘yicha M va FRBga tashrif buyurib, holatni o‘rgangan edik.
O‘shandan keyin, oradan biroz o‘tib, M va FRB xorijga chiqish pasportini olishga talabgorlar navbatlarini biroz kamaytirish uchun Tayloq tumanida Tayloq va Urgut tumanlari aholisiga xizmat ko‘rsatish uchun apparat o‘rnatilganini xabar qilgan edi.
Ammo xorijga chiqish pasportini oluvchilar sonining ko‘pligi uchun bu ham navbatlarni bartaraf etmadi. O‘shanda viloyat M va FRB boshlig‘i Davron Norchayev yilning ikkinchi yarmida yana bir necha tumanda uskunalar o‘rnatilishini ma’lum qilgan edi.
Biz shu masala yuzasidan yana idoraga tashrif buyurib, yil boshida belgilangan vazifa qay darajada bajarilgani bilan qiziqdik.
Davron Norchayevning ma’lum qilishicha, IIB va u boshchilik qilayotgan boshqarma yil boshida belgilangan vazifalarni o‘z vaqtida bajarish ustida ishlayapti. Shu munosabat bilan hozirgi vaqtda bilan yana beshta qo‘shimcha xorijga chiqish pasporti rasmiylashtirish uskunalari olib kelinib, Samarqand va Kattaqo‘rg‘on shaharlarida, Urgut, Tayloq, Payariq va Samarqand tumanlarida o‘rnatildi.
O‘rnatilgan uskunalar bo‘yicha taqsimot hozircha qo‘yidagicha belgilangan: Payariq tumanida o‘rnatilgan uskuna Payariq, Ishtixon, Qo‘shrabot va Oqdaryo tumanlari, Kattaqo‘rg‘on shahridagi uskuna Kattaqo‘rg‘on shahri, Kattaqo‘rg‘on, Narpay va Paxtachi tumanlari, Tayloq tumanidagisi Tayloq, Samarqand, Jomboy va Bulung‘ur tumanlari hamda Urgut tumanidagisi Urgut tumani, Samarqand shahrida o‘rnatilgan uskuna Samarqand shahri, Samarqand viloyati IIB M va FRBdagi uskuna esa Samarqand shahri, Pastdarg‘om va Nurobod tumanlari aholisiga xizmat ko‘rsatadi.
“Shu munosabat bilan Samarqand viloyat IIB M va FRB viloyat aholisini xorijga chiqish pasporti rasmiylashtirish uchun yuqorida ko‘rsatilgan tumanlardagi IIB M va FRBlarga murojaat qilishlarini so‘raymiz”, – dedi Norchayev biz bilan suhbatda.
Shuningdek, Norchayevning so‘zlariga ko‘ra, yaqin vaqtlarda viloyatning har bir tumanida xorijga chiqish pasportlari beriladigan uskunalar o‘rnatilishi rejalashtirilmoqda.
Hozirgi kunda mavjud navbatlarni yakuniga yetkazish va aholiga yanada qulaylik yaratish uchun viloyat IIB M va FRB hamda uning quyi tizimlarida shanba va yakshanba kunlari ham ish kuni sifatida faoliyat ko‘rsatilishi belgilangan.
Sohaga tegishli yana bir yangilik – endi xorijga chiqish pasportini olmoqchi bo‘lganlar oldingiday ish joyidan va mahalladan ma’lumotnoma olish va anketa to‘ldirish uchun ovora bo‘lib yurmaydi. Endi viloyat va tumanlardagi IIB M va FRBga faqat pasportning o‘zini olib kelsalar yetarli bo‘ladi. Anketa bo‘limlarning o‘zida elektron tarzda to‘ldiriladi.
Shu bilan birga, viloyat M va FRB aholini xorijga chiqish pasportini rasmiylashtirish yuzasidan vujudga keladigan tushunmovchiliklar bo‘yicha quyidagi telefon raqamlari orkali murojaat qilishi mumkinligini ma’lum qildi:
Samarqand viloyat IIB M va FRB boshlig‘i Norchayev Davron Ochilovich: (366) 223-50-26, (97) 484-26-47;
Samarqand viloyat IIB M va FRB bo‘lim boshlig‘i Mo‘minov Sheroz: (93) 353-03-30.
Eslatib o‘tamiz, xorijga chiqish uchun alohida pasport mamlakat Prezidentining 2017-yil 16-avgustdagi “O‘zbekiston Respublikasi fuqarolarining xorijga chiqish tartibini takomillashtirishga doir muhim chora-tadbirlar to‘g‘risida”gi farmoni asosida 2019-yil 1-yanvaridan boshlab joriy etilgan.
Yangi tartib bo‘yicha, O‘zbekiston fuqarosi xorijga chiqish uchun biometrik pasportga ega bo‘lishi hamda ushbu pasport Vazirlar Mahkamasi huzuridagi Davlat personallashtirish markazi tomonidan 10 ish kuni davomida tayyorlanib berishi belgilangan.
Shuningdek, fuqarolar endi xorijga chiqish pasportini olish uchun ish joyi, o‘qish maskani yoki hududiy o‘zini o‘zi boshqarish organi tomonidan muhr bilan tasdiqlangan ariza-anketa tayyorlab borishi bekor qilingan va endi fuqaro faqatgina pasporti bilan boradi hamda eng kam ish haqining 120 foizi miqdoridagi (voyaga yetmaganlar uchun EKIHning 80 foizi miqdorida) davlat boji to‘laydi.
Xorijga chiqish uchun biometrik pasport 1 yoshgacha bo‘lgan bolalarga 2 yil, voyaga yetmagan bolalarga 5 yil, voyaga yetgan fuqarolarga 10 yil muddatga beriladi.
G‘ayrat Yo‘ldosh tayyorladi.
Izoh (0)