Адлия вазирлиги маҳаллий кенгашлар депутатлари учун амалий тавсиялар ишлаб чиқди. Бу ҳақда вазирлик жамоатчилик билан алоқалар бўлимига таяниб, «Газета.uz» хабар берди.
Декабрда Олий Мажлис Қонунчилик палатаси ва халқ депутатлари маҳаллий кенгашларига депутатлар сайлови бўлиб ўтади. Сайлов санаси Марказий сайлов комиссияси томонидан эълон қилинади, сайлов кампанияси эса сентябрда бошланади.
Адлия вазирлиги томонидан маҳаллий кенгашлар депутатлари учун тайёрланган қўлланмада депутатликнинг ҳуқуқий асослари, кенгашлар фаолиятнинг регламентлари, шунингдек, мавжуд ҳуқуқ ва имкониятлардан самарали фойдаланиш бўйича амалий тавсиялар ўрин олган. Шунингдек, мавжуд муаммолар қайд этилиб, уларни бартараф этиш учун амалий таклифлар ҳам баён қилинган.
Вазирликнинг қайд этишича, бугунги кунда депутатлар ишини самарали ташкил этиш, маҳаллий кенгашлар фаолиятини жонлантириш кун тартибидаги асосий масалалардан бири бўлиб турибди.
«Ҳозирда депутатларнинг асосий вазифаси ўз-ўзини ташкиллаштириш ва бошқариш эмас, фуқароларга давлат томонидан кўрсатиладиган ижтимоий хизматларнинг жойларда амалга оширилишини таъминлашдан иборат бўлиб қолмоқда», — дейилади хабарда.
Изоҳ (0)