«Дарё» интернет нашрида жорий йилнинг февраль ойида Қашқадарё вилоятининг Деҳқонобод туманидаги жин кўприк хусусида сўз юритилганди. Мақолада туманнинг Чоштепа қишлоғидаги 2 та жинкўприк тилга олинади. «Дарё» мухбири яна бир бор Деҳқонободда бўлиб, ўзгаришлар хусусида маълумот олди.
Ўрганиш натижаларига кўра, туманда 27 та таъмирга муҳтож кўприк бўлиб, айни кунга қадар 14 та кўприк таъмирланиб, фойдаланишга топширилган. 13-кўприк аҳолига топширилгани хусусида ҳам хабар бергандик.
«Дарё»да чоп этилган дастлабки мақолада Чоштепа қишлоғидаги 2005 йил қурилган 170 метрли ва 1989 йил қурилган 110 метрли кўприклар хусусида сўз борганди. Қишлоқ аҳолисининг маълумот беришича, Обиравон ҚФЙга қарашли «Чоштепа», «Қўчқорбулоқ» ва «Авлод» қишлоқларида яна шундай 4 та кўприк мавжуд бўлиб, ҳудудда жами 7 та жинкўприк мавжуд.
«Чоштепа» қишлоғига киришдаги дастлабки жинкўприк 170 метр бўлиб, 2005 йил қурилган.
Иккинчи кўприк эса ҳудуддаги 63-мактабга элтувчи кўприк бўлиб, 1989 йил қурилган. Маҳаллий аҳоли вакиллари сўзига кўра, жин кўприкларнинг энг «кекса»си шу.
Туман ҳокими Зоир Алиқуловнинг маълум қилишича, мазкур 170 ва 110 метрли кўприклар учун жами 32 миллион маблағ ажратилган бўлиб, қурилиш материаллари харид қилинган. Яқин кунларда аҳоли кучи билан таъмирлаш ишлари бошланади.
— Мақолада тилга олинган ҳар иккала кўприк учун туман ҳокими ташаббуси билан маҳаллий бюджетдан 32 миллион сўм ажратилиб, таъмирлаш ишлари учун қурилиш анжомлари харид қилинди, — дейди Чоштепа МФЙ раиси Шерзод Боллиев. – Насиб этса яқин кунларда кўприкни таъмирлаш ишларини бошлаймиз.
МФЙ раисининг айтишича, таъмирлаш ишлари аҳоли кучи билан амалга оширилади.
Учинчи жин кўприк «Авлод» қишлоғидаги жин кўприк бўлиб, маҳаллий аҳоли сўзига кўра 1990 йилларда қурилган. Узунлиги 30 метр.
Учинчи жин кўприк яқинида яна бир кичик кўприк жойлашган бўлиб, ундан ҳатто машиналар ҳам ўтади.
Тўртинчи кўприк ҳам «Авлод» қишлоғида жойлашган бўлиб, 1990 йилларда Рустам Ҳалилов ташаббуси билан қурилган бўлиб, узунлиги 100 метрни ташкил этади.
Айни кунда мазкур кўприкни таъмирлаш ишлари бошлаб юборилган бўлиб, ярми аҳоли томонидан таъмирланган. Маҳаллий бюджетдан яна 5 миллион сўм ажратилиб, таъмирлаш ишлари якунига етказилади.
Мамаюсуф Қурбонов ташаббуси билан қурилган 5-кўприкнинг узунлиги 65 метр бўлиб, 2018 йил Ғанишер Умрзоқов томонидан 15 миллион сўм маблағ эвазига қайта таъмирланиб фойдаланишга топширилган.
Маҳаллий аҳоли вакилларининг сўзига кўра, «Қўчқорбулоқ» қишлоғидаги 6- ва 7-кўприклар, ушбу қишлоқ фарзанди Ўрал Ҳамраев ташаббуси билан қурилган бўлиб, ҳар иккисининг узунлиги ҳам 100 метрни ташкил этади.
Маълумот беришларича, бундан 20 йил олдин қишлоқда Эшназар Соатов томонидан трубали кўприк ҳам қурилган бўлиб, бугунги кунгача етиб келмаган. Бузилиб кетган.
Ўша кунги сафаримиз чоғида «Чоштепа» қишлоғидаги ўзгаришларга ҳам гувоҳ бўлдик. Маълум бўлишича, 22 йил давомида «Чоштепа», «Авлод», «Қўчқорбулоқ» каби қишлоқ аҳолисига бозор вазифасини ўтаб келган, таъбир жоиз бўлса ўрта асрлар муҳитини эслатувчи қаровсиз бозор, тадбиркор Бекзод Бердиевнинг ташаббуси билан бошқа ҳудудга кўчирилиб, 400 миллион маблағ эвазига қайта таъмирланмоқда.
Таъмирлаш ишлари деярли якунига етган. Маълум қилинишича, ҳудудда ҳар душанба куни бўладиган бозор озиқ-овқат бозори бўлиб, ундан нарида мол бозори ҳам иш бошлаган.
Шунингдек, баҳор ойларидаги селлар йўлни ювиб кетмаслиги учун қишлоқда селтўсиқ ҳам қурилиб, йўллар таъмирланмоқда. Аниқланишича, ушбу ишлар учун 540 миллион сўм маблағ ажратилган.
Қолаверса, «Чоштепа» ва «Авлод» қишлоқлари ўртасидаги катта кўприк ҳам 460 миллион маблағ эвазига замонавий кўриниш касб этмоқда.
Кези келганда шуни алоҳида таъкидлаш керакки, Деҳқонободда қарийб 27 йил давомида ночор ва ёрдамга муҳтож бўлиб келган 27 та кўприкнинг 14 таси сўнгги бир йилда таъмирланиб фойдаланишга топширилди. Кузатувларимизга кўра, яна 3 та жин кўприк ва 1 та катта кўприкка маблағ ажратилиб, (қувонарлиси 2 та жинкўприк «Дарё» танқидидан сўнг) таъмирлаш ишлари бошланиш арафасида. Демакки, ҳисоб бўйича 18 кўприк дегани бу. Излаган имкон топар деганларидек, Деҳқонобод туман ҳокимлиги ҳам қарийб 27 йил давомида таъмирланмай келаётган 27 та кўприкнинг 18 тасини таъмирлашга улгурмоқда. Туман ҳокимлигининг бу каби саъй-ҳаракати таҳсинга лойиқ, албатта.
Изоҳ (0)