Марказий Осиё мотоцикллар уюшмасининг ташаббуси билан жорий йил 26 июндан бошлаб Марказий Осиё мамлакатлари — Қозоғистон, Қирғизистон, Ўзбекистон ва Тожикистон бўйлаб «Яйловнинг 2019 йилдаги йўли» шиори остида мотоцикл пойгаси ўтказилмоқда. Пойгачилар жорий йил 26 июнь куни Қозоғистоннинг Чимкент шаҳридан йўлга чиқишиб, 30 июнь куни «Дўстлик» чегара божхона пости орқали Ўзбекистонга кириб келди.
Самарқанд вилояти божхона бошқармаси ахборот хизматининг «Дарё»га маълум қилишича, водий орқали Ўзбекистонга ташриф буюрган мотопойгачилар 4 июль куни Самарқандга етиб келган иштирокчилар шаҳарнинг тарихий обидаларини зиёрат қилди. Меҳмонлар иштирокида вилоятда «Шердор» мотоциклчилар спорт клуби ташкил этилди. 5 июль куни пойгачилар Самарқанддан Тожикистоннинг Хўжанд шаҳрига йўл олди.
– Бизлар Чимкентдан 16 та мотоциклда 18 киши йўлга чиққан эдик. Самарқандга келиб 30 кишидан ошиб кетдик. Биз пойга мусобақаси орқали Марказий Осиё давлатларининг туризм соҳасини ривожланлантирмоқчимиз, — дейди мусобақаси ташкилотчиси Аскат Сейитбеков. – Бизлар икки кун давомида Самарқанднинг диққатга сазовор жойларини томоша қилдик. Айниқса, Registon майдони, Гўри Амир мақбараси, Шохи Зинда мажмуаси ва Мирзо Улуғбек расадхонаси бизда катта таассурот қолдирди.
Марказий Осиёда халқларининг тарихи ва маданиятини ўрганиш орқали уларнинг дўстона муносабатларини мустаҳкамлаш мақсадида ташкил этилган пойга Марказий Осиёдаги шаҳарлар ва тарихий жойларга ташрифлар, мамлакатларнинг турмуш тарзи билан танишиш кўзда тутилган.
Изоҳ (0)