5 июлнинг эътиборга молик янгиликлари — «Дарё» дайжестида.
Сурхондарёда электрдан қарзи туфайли тармоқдан узиб қўйилган уй эгалари МИБ ходимларини дўппослади.
МИБ ходимлари қарзи бор хонадонни тармоқдан узмоқчи бўлади. Уй эгалари эса бундан дарғазаб бўлиб, ходимларни дўппослаган.
Кейинроқ Сурхондарёда МИБ ходимларини дўппослаганлар ушлангани, уларга нисбатан жиноий иш қўзғатилгани хабар берилди.
***
Бухородаги «Колхоз» бозорида жойлашган бир қатор дўконлар ёниб кетди.
Бухоро шаҳри марказий бозорида («Колхоз» бозор) жойлашган бир қатор дўконларнинг ёниб кетгани тасвирланган суратлар пайдо бўлди.
Кейинроқ дўконларнинг ёниб кетишига тунда ёниқ ҳолда қолдирилган кондиционер сабаб бўлгани маълум қилинди.
***
Адлия вазирлиги Гулнора Каримова сақланаётган аёллар колониясида ўтказилган ўрганиш натижаларини эълон қилди.
Вазирликнинг қайд этишича, яшаш шароитлари Жиноят-ижроия кодексининг 117-моддасига мос келади. Ушбу моддада маҳкумларнинг умумий режим колонияларида умумий яшаш жойларида яшаши белгиланган.
***
Қорақалпоғистондаги Судочье кўли ёнмоқда.
Кўл бўйлаб бир нечта ёнғин ўчоқлари бор. Энг яқин аҳоли пунктигача бўлган масофа чўл ҳудуди орқали 50 километрча чиқади.
***
UzAuto Motors компанияси янги моделлар ва янги ранглардаги автомобилларни йил охирига қадар тақдим этади.
UzAuto Motors компанияси раҳбарининг қайд этишича, Cobalt ўрнига янги модель ишлаб чиқарилади ва у йил охирига қадар тақдим этилади.
Шунингдек, йил охирига қадар SUV тоифадаги машиналар ҳамда Тошкентда йиғиладиган Chevrolet Trailblazer, Chevrolet Equinox ва Chevrolet Traverse автомобилларининг ҳам ишлаб чиқарилиши йўлга қўйилади.
Изоҳ (0)