ХХХ ёзги Универсиада. Ўзбекистон дастлабки медални қўлга киритди

Италиянинг Неапол шаҳри мезбонлик қилаётган ёзги Универсиаданинг дзюдо бўйича биринчи кун баҳслари якунланди.

Жисмоний тарбия ва спорт вазирлиги матбуот хизматининг хабар беришича, эркаклар ўртасидаги беллашувларнинг +90 кг вазн тоифасида Муҳаммадкарим Хуррамов «А» гуруҳида америкалик Керр Масон Пипер, венгриялик Петер Арваи ва Богдан Воицикни мағлуб этиб, ярим финалда япониялик Канта Накано имкониятни бой бериб қўйди. Бронза медали учун кечадиган баҳсда эса польшалик Олексий Лисенко устидан ишончли ғалаба қилган Маҳаммадкарим Ўзбекистон делегацияси ҳисобига ушбу универсиададаги илк медални тақдим этди.

Шунингдек, -90 кг вазн тоифасида Давлат Бобонов аввалига саудиялик Абдулраҳмон ал-Рамманни, кейин япониялик Гоки Tajimaни мағлуб этиб, чорак финалга йўл олди. Аммо ушбу босқичда у бразилиялик Густаво Ассисга мағлуб бўлди.

Мусобақанинг аёллар ўртасидаги баҳсларнинг -70 кг вазн тоифасида иштирок этаётган Гулноза Матниёзова илк босқичда кореялик Е Вон Лидан устун келди. Аммо иккинчи даврада у россиялик Мадина Таймазовага ютқазиб қўйди. Бронза медали учун ўтказилган қўшимча саралаш босқичида эса у дастлаб Гирдзуите Жиойя Феттерлини мағлуб этишга муваффақ бўлди. Бироқ ҳал қилувчи баҳсда германиялик Сара Мекелбургга имкониятни бой бериб қўйди.

+70 кг вазн тоифасида Нодира Йўлдошева италиялик Дебора Салани енгишга муваффақ бўлди, аммо чорак финалда жанубий кореялик Ми Жин Хан тўсиғидан ўта олмади. Бронза медали учун ўтказилган қўшимча саралаш босқичида эса у франсиялик Валентин Маршанга мағлуб бўлди.

Эслатиб ўтмаиз, универсиада дастурида дзюдо бўйича мусобақалар 4-7 июль кунлари ўтказилиши белгиланган.