Ўзбекистонда Бандлик ва меҳнат муносабатлари вазирлиги 2019 йилнинг I ярим йиллигида Россиянинг Хорижий фуқароларни вақтинчалик сақлаш марказларида бўлиб келаётган, ҳужжат ва маблағларсиз қийин аҳволда қолган жами 719 нафар ўзбекистонликларни мамлакатга қайтарди. Бу ҳақда вазирлик матбуот хизмати хабар берди.
Фуқароларни ортга қайтариш билан боғлиқ барча харажатлар вазирлик ҳузуридаги Хорижда меҳнат фаолиятини амалга оширувчи шахсларни қўллаб-қувватлаш ҳамда уларнинг ҳуқуқ ва манфаатларини ҳимоя қилиш жамғармаси ҳисобидан қопланган.
Қайд этилишича, хорижда қийин аҳволда қолган фуқароларни Ўзбекистонга қайтариш доирасида аниқ ташкилий чора-тадбирлар йўлга қўйилган.
- Фуқаролар Тошкент халқаро аэропортида Ташқи меҳнат миграцияси агентлиги, Давлат хавфсизлик хизмати, Ички ишлар вазирлиги масъул вакиллари томонидан кутиб олинади ва ташкилий тартибда Агентликка олиб борилади.
- Агентликда фуқаролар шифокорлар томонидан бепул махсус тиббий кўрикдан ўтказилади.
- Бандлик ва меҳнат муносабатлари вазирлиги ҳамда Агентликнинг тегишли мутахассислари қайтиб келган фуқароларнинг ҳар бир гуруҳи билан ишга жойлашиш, касбга ўқитиш ва қайта ўқитиш масалалари юзасидан мулоқот ўтказади.
- Хорижда қийин аҳволда қолган юртдошларимиз вазияти ҳисобга олиниб, уларга яшаш жойларига етиб олишлари учун энг кам ойлик иш ҳақининг 1 баравари миқдорида пул берилади.
Изоҳ (0)