O‘zbekistonda Bandlik va mehnat munosabatlari vazirligi 2019-yilning I yarim yilligida Rossiyaning Xorijiy fuqarolarni vaqtinchalik saqlash markazlarida bo‘lib kelayotgan, hujjat va mablag‘larsiz qiyin ahvolda qolgan jami 719 nafar o‘zbekistonliklarni mamlakatga qaytardi. Bu haqda vazirlik matbuot xizmati xabar berdi.
Fuqarolarni ortga qaytarish bilan bog‘liq barcha xarajatlar vazirlik huzuridagi Xorijda mehnat faoliyatini amalga oshiruvchi shaxslarni qo‘llab-quvvatlash hamda ularning huquq va manfaatlarini himoya qilish jamg‘armasi hisobidan qoplangan.
Qayd etilishicha, xorijda qiyin ahvolda qolgan fuqarolarni O‘zbekistonga qaytarish doirasida aniq tashkiliy chora-tadbirlar yo‘lga qo‘yilgan.
- Fuqarolar Toshkent xalqaro aeroportida Tashqi mehnat migratsiyasi agentligi, Davlat xavfsizlik xizmati, Ichki ishlar vazirligi mas’ul vakillari tomonidan kutib olinadi va tashkiliy tartibda Agentlikka olib boriladi.
- Agentlikda fuqarolar shifokorlar tomonidan bepul maxsus tibbiy ko‘rikdan o‘tkaziladi.
- Bandlik va mehnat munosabatlari vazirligi hamda Agentlikning tegishli mutaxassislari qaytib kelgan fuqarolarning har bir guruhi bilan ishga joylashish, kasbga o‘qitish va qayta o‘qitish masalalari yuzasidan muloqot o‘tkazadi.
- Xorijda qiyin ahvolda qolgan yurtdoshlarimiz vaziyati hisobga olinib, ularga yashash joylariga yetib olishlari uchun eng kam oylik ish haqining 1 baravari miqdorida pul beriladi.
Izoh (0)