Cybereason компаниясининг мутахассислари бирдагина бир неча мобил алоқа операторларининг мижозларига тегишли шахсий маълумотлар хакерлар томонидан қўлга киритилганини маълум қилди, деб хабар беради «Zakon.kz».
Экспертларнинг сўзларига кўра, кибержиноятчилар сўнгги етти йил ичида алоқа операторларининг хавфсизлик тизимини камида 10 маротаба бузишга муваффақ бўлган. Шунингдек, ҳозирда ҳам хакерлар ўз фаолиятини давом эттирмоқда. Мутахассислар ҳужумга учраган алоқа операторлари номини ошкор қилмади, бироқ улар йирик компаниялар эканлигини таъкидлаб ўтган.
Хакерлар операторларнинг маълумотлар базасини шунчаки бузибгина қолмасдан, уларга тегишли серверларнинг бирида алоқа операторининг ишини тўхтатиб қўйиши мумкин бўлган ўз VPN’нини яратган. Улар қўнғироқ қилинган вақт ёки SMS юборилган одам, телефон эгаси ким билан мулоқот қилгани ва унинг жойлашган жойи каби маълумотларни қўлга киритган.
Маълумотларга кўра, юзлаб миллион абонент хавф остида қолган, бироқ мутахассисларнинг қайд этишича, хакерларни фақатгина йигирма нафар маълум шахс қизиқтирган. Улар Европа, Осиё, Африка, Яқин Шарқда яшовчи инсонлар эканлиги айтилмоқда.
Компаниянинг тахминича, хакерларни давлат қўллаб-қувватламоқда, содир бўлаётган воқеалар ортида хитойлик дастурчилар турган бўлиши мумкин.
Изоҳ (0)