Ўтган ҳафтада ижтимоий тармоқлардаги мавзулар қизиб, попкорн билан кузатиладиган даражага етди. Бир-биридан қизиқ воқеалар, хабарлар одамни янада интернетга боғлайди. Демак, ўтган ҳафта трендларига тўхталамиз.
Ҳозирда мансабини тарк этиб улгурган собиқ Сенат раиси Ниғматилла Йўлдашев яқинда ўтказган коррупцияга қарши йиғилишида Ҳадисдан иқтибос келтириб, пора берган ҳам, пора олган ҳам ғирт дўзахийдир, деб айтди. Аммо бу гаплар халқда катта ишонч уйғотди дейиш қийин. Изоҳларга эътибор берсак, буни яққол сезиш мумкин.
Покистон давлат ходимлари шаффофликни таъминлаш учун Facebook’да тўғридан тўғри эфирда мажлис олиб бормоқчи бўлган эди. Интернетни яхши тушунишмаган чоғи, видеода фильтр, яъни мушукка айлантириб олиш функцияси ёқилиб қолган. Натижада анжуман давомида барча ходимлар мушук шаклида кўрсатилди.
Ҳафтанинг кенг муҳокамага сабаб бўлаётган воқеалардан бири Халқ таълими вазири Шерзод Шерматов билан журналистлар учрашувида берилган савол бўлди. Бир журналист вазирдан шевада эмас, адабий тилда гапириш кераклигини сўраб илтимос қилди. Аммо бу таклиф учрашув иштирокчиларига ёқмади ва улар увиллаб эътирозини билдирган.
Кейинчалик изоҳларда бир неча таниқли журналист ва блогерлар томонидан ҳам бу талаб тўғрилиги эътироф этилди. Хусусан, тилшунос Эльдар Асановнинг Telegram’даги каналида эълон қилинган постда ҳам вазирга қўйилган талаб тўғри эканлиги ҳақида сўз боради.
Водийда яратилгани айтилаётган Matiz кузовли юк машинаси Facebook’да тарқалди. Matiz кузови ва моторида яратилган юк машинасининг қанча ҳажмдаги юкни тортиши, қанча ёқилғи сарфлаши ҳақида маълумот йўқ, аммо кўриниши ажабтовур чиққанини айтиш керак.
Қозоғистонда бўлиб ўтган сайлов қанчалик шубҳали бўлмасин, Назарбоев танлаган номзод Тўқаев ғалабаси билан якунланди. Қозоқ қардошларимиз бундан розими, рози эмасми, буни билмадик, лекин мана бу постда қозоқлар президентлари миллий байроқни ўпишда нега тиз чўкмаслигини танқид остига олган.
«Ҳаётий сабоқлар» каналида Наманганда бўлган таъсирли воқеа сурати эълон қилинди. Унда айтилишича, асаларилар маликаси машина ичида қолиб кетган. Қолган арилар эса икки кун давомида машинага ёпишиб, кетмаган. Машина эгаси келиб, маликани озод қилгач, арилар бу ерни тарк этган.
Комил Алламжонов иштирокидаги мемлар ижтимоий тармоқларда айланди. Комил Алламжонов блогерлар кунига бағишланган учрашувга калта иштонда келган эди. Facebook’даги «Уюшмаган ёшлар» канали мазкур ҳолатни юморга олиб, бир қанча мемлар яратду. Унда Алламжонов Голливуд ва жаҳон юлдузлари билан турганини кўриш мумкин.
Ҳафта расмларидан ўзбекона муносабатларга хос бўлган овсинлар муҳаббатини ифода этувчи суратини келтириш мумкин. Бу суратда юмор орқали илиқ муносабатлар очиб берилган.
Булардан ташқари, «Sayyod.com» ва ҳуқуқ ҳимоячиси Стив Свердлов машмашаси, Сурхондарё сенаторининг эътиборга молик нутқи, янги қарорларга муносабатлар, коррупцияга қарши ёздирилган диктант иншолар ва бошқа теша тегмаган хабарларни эсга олиш мумкин.
Изоҳ (0)