O‘tgan haftada ijtimoiy tarmoqlardagi mavzular qizib, popkorn bilan kuzatiladigan darajaga yetdi. Bir-biridan qiziq voqealar, xabarlar odamni yanada internetga bog‘laydi. Demak, o‘tgan hafta trendlariga to‘xtalamiz.
Hozirda mansabini tark etib ulgurgan sobiq Senat raisi Nig‘matilla Yo‘ldashev yaqinda o‘tkazgan korrupsiyaga qarshi yig‘ilishida Hadisdan iqtibos keltirib, pora bergan ham, pora olgan ham g‘irt do‘zaxiydir, deb aytdi. Ammo bu gaplar xalqda katta ishonch uyg‘otdi deyish qiyin. Izohlarga e’tibor bersak, buni yaqqol sezish mumkin.
Pokiston davlat xodimlari shaffoflikni ta’minlash uchun Facebook’da to‘g‘ridan to‘g‘ri efirda majlis olib bormoqchi bo‘lgan edi. Internetni yaxshi tushunishmagan chog‘i, videoda filtr, ya’ni mushukka aylantirib olish funksiyasi yoqilib qolgan. Natijada anjuman davomida barcha xodimlar mushuk shaklida ko‘rsatildi.
Haftaning keng muhokamaga sabab bo‘layotgan voqealardan biri Xalq ta’limi vaziri Sherzod Shermatov bilan jurnalistlar uchrashuvida berilgan savol bo‘ldi. Bir jurnalist vazirdan shevada emas, adabiy tilda gapirish kerakligini so‘rab iltimos qildi. Ammo bu taklif uchrashuv ishtirokchilariga yoqmadi va ular uvillab e’tirozini bildirgan.
Keyinchalik izohlarda bir necha taniqli jurnalist va blogerlar tomonidan ham bu talab to‘g‘riligi e’tirof etildi. Xususan, tilshunos Eldar Asanovning Telegram’dagi kanalida e’lon qilingan postda ham vazirga qo‘yilgan talab to‘g‘ri ekanligi haqida so‘z boradi.
Vodiyda yaratilgani aytilayotgan Matiz kuzovli yuk mashinasi Facebook’da tarqaldi. Matiz kuzovi va motorida yaratilgan yuk mashinasining qancha hajmdagi yukni tortishi, qancha yoqilg‘i sarflashi haqida ma’lumot yo‘q, ammo ko‘rinishi ajabtovur chiqqanini aytish kerak.
Qozog‘istonda bo‘lib o‘tgan saylov qanchalik shubhali bo‘lmasin, Nazarboyev tanlagan nomzod To‘qayev g‘alabasi bilan yakunlandi. Qozoq qardoshlarimiz bundan rozimi, rozi emasmi, buni bilmadik, lekin mana bu postda qozoqlar prezidentlari milliy bayroqni o‘pishda nega tiz cho‘kmasligini tanqid ostiga olgan.
“Hayotiy saboqlar” kanalida Namanganda bo‘lgan ta’sirli voqea surati e’lon qilindi. Unda aytilishicha, asalarilar malikasi mashina ichida qolib ketgan. Qolgan arilar esa ikki kun davomida mashinaga yopishib, ketmagan. Mashina egasi kelib, malikani ozod qilgach, arilar bu yerni tark etgan.
Komil Allamjonov ishtirokidagi memlar ijtimoiy tarmoqlarda aylandi. Komil Allamjonov blogerlar kuniga bag‘ishlangan uchrashuvga kalta ishtonda kelgan edi. Facebook’dagi “Uyushmagan yoshlar” kanali mazkur holatni yumorga olib, bir qancha memlar yaratdu. Unda Allamjonov Gollivud va jahon yulduzlari bilan turganini ko‘rish mumkin.
Hafta rasmlaridan o‘zbekona munosabatlarga xos bo‘lgan ovsinlar muhabbatini ifoda etuvchi suratini keltirish mumkin. Bu suratda yumor orqali iliq munosabatlar ochib berilgan.
Bulardan tashqari, “Sayyod.com” va huquq himoyachisi Stiv Sverdlov mashmashasi, Surxondaryo senatorining e’tiborga molik nutqi, yangi qarorlarga munosabatlar, korrupsiyaga qarshi yozdirilgan diktant insholar va boshqa tesha tegmagan xabarlarni esga olish mumkin.
Izoh (0)