Андижон аэрапорти қайта таъмирланиб, ўрнида жаҳон стандарти талабларига ҳар томонлама жавоб берадиган Ўзбекистон герби тимсолидаги экоаэрапорт қуриб битказилади. Бу ҳақда Андижон вилояти ҳокимининг хорижий мамлакатлардаги инвестиция ва иқтисодий ривожлантириш бўйича вакили Фарҳоджон Расуловга таяниб «Дарё» мухбири хабар бермоқда.
Жорий йилнинг 25 июнь куни вилоят ҳокими Шуҳратбек Абдураҳмонов Хитойнинг Zhejiang Comminications Construction Group Co. Ltd компанияси вакили Ху Рен Кионг ва Италиянинг «Евроком» компанияси раиси Вальтер Феррони қабул қилди ва улар томонидан илгари сурилаётган инвестицион лойиҳалар билан танишди.
Вилоят раҳбари меҳмонларга мамлакатда сўнгги йилларда инвестицион лойиҳаларни ривожлантириш учун барча имкониятлар яратилаётганлиги, бундан унумли фойдаланиш ҳар бир инвесторнинг ўзига боғлиқлигини, ҳокимлик томонидан қандай ёрдам керак бўлса тайёр эканлигини билдирди.
«Андижон аэропортини маҳаллий мутахассислар билан биргаликда кўздан кечирдик, — дейди Ху Рен Кионг. – Тўғриси қизиқишимиз янада ортди. Ҳозир вилоят раҳбарига айтганимиздек ушбу аэропорт ўрнида янги замонавий жаҳон стандарти талабларига жавоб берадиган экоаэропорт барпо этилади. Лойиҳанинг эътиборли жиҳатларидан яна бири порт терминали Ўзбекистон герби тимсолида бўлади. Қурилиш ишлари жорий йилнинг август сентябрь ойларида бошланиб, келгуси йилнинг охирига қадар якунланади».
«Компания халқаро миқёсидаги йирик лойиҳаларни молиялаштириш билан шуғулланади, — дейди Вальтер Ферро. – Андижондаги бир қатор лойиҳаларга қизиқиш билдираяпмиз. Жумладан, Андижон cитй лойиҳасини амалга оширишни молиялаштириш таклифини берганмиз. Мутасаддилар ушбу ташаббусимизни қўллаб-қувватлашига ишонамиз».
Учрашув якунида икки томонлама англашув меморандуми имзоланди.
Шунингдек, Покистон ва Туркиядан ташриф буюрган инвесторлар билан ҳам учрашув ўтказилиб, музокаралар олиб борилди.
Изоҳ (0)