2018–2019-ўқув йилида Қашқадарёдаги мавжуд 1117 та мактабни 32 501 нафар битирувчи тамомлади. Шундан 206 нафар битирувчи олтин, 283 нафар ўқувчи кумуш медалга муносиб кўрилди, дея хабар беради «Дарё» мухбири.
19 июнь куни Қарши шаҳридаги «Ватанпарварлар» боғида 489 нафар олтин ва кумуш медаль соҳибларини тақдирлаш маросими бўлиб ўтди.
Тадбирда сўз олган вилоят ҳокими Зафар Рўзиев, Ўзбекистон Халқ бахшиси Қаҳҳор бахши Раҳимов ҳамда вилоят халқ таълими бошқармаси бошлиғи Бекзод Жўраев бундан 20 йил олдин йўқ бўлиб кетган анъана Президент Шавкат Мирзиёев ташаббуси билан яна ҳаётга татбиқ этилгани, мактаб битирувчиларининг энг аълочиларига олтин ва кумуш медаль тақдим этиш жорий қилинганини таъкидлади.
Қашқадарё вилоят халқ таълими бошқармаси бошлиғи ўринбосари Мақсуд Панжиевга кўра, жорий ўқув йилида фан олимпиадасининг республика босқичида 3 нафар қашқадарёлик ўқувчи фахрли ўринларни қўлга киритган бўлса, Деҳқонобод туманидаги 85-умумтаълим мактабининг рус тили фани ўқитувчиси Иқбол Аралова халқ таълими вазирлиги томонидан ташкил этилган «Энг яхши рус тили ўқитувчиси» кўрик-танловида 2-ўрин соҳиби сифатида Россия Федерациясига 5 кунлик саёҳат қилиш имкониятини қўлга киритган.
Шунингдек, Деҳқонобод туманидаги 89-мактабнинг 10-синф ўқувчиси Севинч Шоматова эса куни кеча якунланган «Мен севган адабий қаҳрамон» республика иншолар танловида 1-ўринни қўлга киритган.
Маълумот ўрнида, вилоятда 11-синф битирувчиларининг 883 нафарига аъло даражали касб малака дипломи ҳам топширилган.
Изоҳ (0)