Тошкент шаҳри Мирзо Улуғбек тумани 210-сонли мактаб ўқувчилари 8 ёшли Зафаржон Қўчқоров ва унинг 6 ёшли синглиси Зебохон Қўчқорова 2019 йил Россияда бўлиб ўтадиган Халқаро Нобель конгрессига таклиф қилинди. Бу ҳақда «Дарё» мобил мухбири хабар берди.
Бу конгрессда Алфред Нобелнинг оила аъзолари ва барча Халқаро Нобель мукофотига сазовор бўлган европалик ва америкалик олимлар қатнашади. Зафаржон ва Зебохон шахсан Халқаро Нобель марказининг президенти, Нобель Медальи совриндори, академик Вячеслав Тюттюнник томонидан таклиф қилинган.
2019 йил апрель ойида Тошкент шаҳрига махсус ташриф билан келган Вячеслав Тюттюнник Зафаржон ва Зебохон билан суҳбат ўтказди ҳамда уларнинг кимё фанидан билимларини синовдан ўтказди.
Зафаржон Д.I.Менделеевнинг кимёвий элеметлар жадвалини уч дақиқада ёзиб берди, Зебохон эса бутун дунёдаги Нобель мукофоти совриндорларини номма ном қилган кашфиётлари билан рус тилида айтиб берди.
Вячеслав Тюттюнник болажонларнинг илмига тассано айтиб шундай деди: «Ўзбек илмида яна янги давр шаклланибди. Бутун ўзбек халқини табриклайман. Сиз ўзбек илмининг келажагисиз».
Ҳатто 6 ёшли Зебохоннинг 200 га яқин Нобель мукофоти совриндорларини ёддан билиши ва кимёвий терминларни изоҳлашига шундай муносабат билдирди: «Биласанми Зебохон, бутун дунёда Нобель мукофоти совриндорларини битта камина билардим. Аммо энди икки киши бўлдик. Бундан буён Нобель совриндорлари бўйича менга савол беришса, Ўзбекистонда яна бир 6 ёшли Нобелистика билимдони бор, ана шу билимдонга мурожаат қилинглар деб айтаман».
Бу суҳбат болажонларга конгрессда бутун дунё олимлари билан бирга минбарга чиқиб доклад ўқиш имкониятини берди. 8 ёшли Зафаржон Қўчқоров ва унинг 6 ёшли синглиси Зебохон Қўчқорова 4 ёшидан бошлаб кимё ва математика фанларига меҳр қўйган. Бундан ташқари Зафаржон ментал математика билан шуғулланади. Яқинда Тошкент шаҳрида ўтказилган турнирда қатнашди ва совриндор бўлди.
Изоҳ (0)