Toshkent shahri Mirzo Ulug‘bek tumani 210-sonli maktab o‘quvchilari 8 yoshli Zafarjon Qo‘chqorov va uning 6 yoshli singlisi Zeboxon Qo‘chqorova 2019-yil Rossiyada bo‘lib o‘tadigan Xalqaro Nobel kongressiga taklif qilindi. Bu haqda “Daryo” mobil muxbiri xabar berdi.
Bu kongressda Alfred Nobelning oila a’zolari va barcha Xalqaro Nobel mukofotiga sazovor bo‘lgan yevropalik va amerikalik olimlar qatnashadi. Zafarjon va Zeboxon shaxsan Xalqaro Nobel markazining prezidenti, Nobel Medali sovrindori, akademik Vyacheslav Tyuttyunnik tomonidan taklif qilingan.
2019-yil aprel oyida Toshkent shahriga maxsus tashrif bilan kelgan Vyacheslav Tyuttyunnik Zafarjon va Zeboxon bilan suhbat o‘tkazdi hamda ularning kimyo fanidan bilimlarini sinovdan o‘tkazdi.
Zafarjon D.I.Mendeleyevning kimyoviy elemetlar jadvalini uch daqiqada yozib berdi, Zeboxon esa butun dunyodagi Nobel mukofoti sovrindorlarini nomma nom qilgan kashfiyotlari bilan rus tilida aytib berdi.
Vyacheslav Tyuttyunnik bolajonlarning ilmiga tassano aytib shunday dedi: “O‘zbek ilmida yana yangi davr shakllanibdi. Butun o‘zbek xalqini tabriklayman. Siz o‘zbek ilmining kelajagisiz”.
Hatto 6 yoshli Zeboxonning 200 ga yaqin Nobel mukofoti sovrindorlarini yoddan bilishi va kimyoviy terminlarni izohlashiga shunday munosabat bildirdi: “Bilasanmi Zeboxon, butun dunyoda Nobel mukofoti sovrindorlarini bitta kamina bilardim. Ammo endi ikki kishi bo‘ldik. Bundan buyon Nobel sovrindorlari bo‘yicha menga savol berishsa, O‘zbekistonda yana bir 6 yoshli Nobelistika bilimdoni bor, ana shu bilimdonga murojaat qilinglar deb aytaman”.
Bu suhbat bolajonlarga kongressda butun dunyo olimlari bilan birga minbarga chiqib doklad o‘qish imkoniyatini berdi. 8 yoshli Zafarjon Qo‘chqorov va uning 6 yoshli singlisi Zeboxon Qo‘chqorova 4 yoshidan boshlab kimyo va matematika fanlariga mehr qo‘ygan. Bundan tashqari Zafarjon mental matematika bilan shug‘ullanadi. Yaqinda Toshkent shahrida o‘tkazilgan turnirda qatnashdi va sovrindor bo‘ldi.
Izoh (0)