Ўзбекистонда шаҳарсозлик тўғрисидаги қонун ҳужжатларини такомиллаштириш, шаҳар ва кишлоқларнинг меъморий қиёфасини лойиҳалаштиришда инновацион ёндашувлар ва қурилиш сифатини таҳлил қилиш, «ақлли шаҳар» концепциясини жорий этиш борасида мутахассислар томонидан тизимли ишлар олиб борилмоқда.
Бу ҳақда Олий Мажлис Қонунчилик палатасининг Саноат, қурилиш ва савдо масалалари қўмитаси аъзоси Қутлимурат Бабашев қуйидагиларни маълум қилди:
—Мамлакатда шаҳарсозлик соҳаси 100 дан ортиқ қонун ва қонуности ҳужжатлар билан тартибга солинмоқда. Мазкур йўналишдаги асосий ҳужжат Шаҳарсозлик кодекси бўлиб, унда соҳани тартибга солиш бўйича зарур норма ва тушунчалар берилган. Қурилиш ишларини амалга оширишда биринчи навбатда инсон хавфсизлигини таъминлашга алоҳда эътибор қаратилади.
Бироқ соҳада муаммолар ҳам бор. Бугунги кунда амалдаги 337 та шаҳарсозлик норма ва қоидаси, 128 та давлат стандарти мавжуд бўлиб, уларнинг кўпи замон талабларига жавоб бермаяпти. Мавжуд 1200 та шаҳар, аҳоли пунктлари бош режаларининг тахминан 70 фоизини қайта ишлаб чиқиш зарур. Айни пайтда қурилиш соҳасига замонавий технологияларни жорий этиш эса 30-40 фоизни ташкил этмоқда. Қурилиш объектларида ишлаётганларнинг 80 фоиздан ортиғи қурувчи эмас.
Сифатни бошқариш тизимида халқаро тан олинган усуллар бўйича таҳлил қиладиган бўлсак, биринчи галда соҳага малакали мутахассисларни жалб қилиш зарур. Кадрлар тайёрлаш тизимини такомиллаштириш, бўлажак мутахассисларни малакасини ошириш керак. Шунингдек, сифатли қурилиш материалларини ишлаб чиқаришда табиий шароитни ҳисобга олиш, синов-лабораторияларини зарур жиҳозлар билан таъминлаш чораларини кўриш лозим. Муҳими, лойиҳалаш-қурилиш ишлари жараёнида юқори аниқликни таъминлаш бугунги куннинг асосий талабларидан бири.
Изоҳ (0)