18 июнь куни Қашқадарё вилоятининг Қарши туманида жойлашган, умумий майдони 1000 гектар бўлган Хонобод ҳарбий аэродроми — 10329-сонли ҳарбий қисм ташкил этилганлигининг 70 йиллик юбилейи муносабати билан ҳарбий қисмда байрам тадбири ташкил этилди. Бу ҳақда «Дарё» мухбири хабар бермоқда.
Тадбир аввалида Президент Шавкат Мирзиёевнинг 2018 йил январь ойида вилоятга ташрифи давомида берган кўрсатмаси асосида ташкил этилган Хонобод ҳарбий аэродромидаги беш турдаги самолётлар ва марказда учувчининг рамзий ҳайкали жой олган мусаффо осмон остидаги очиқ музейнинг очилиш маросими бўлиб ўтди.
Тадбир давомида вилоят ҳокими, ҳарбий - маъмурий сектор раҳбари Зафар Рўзиев ва Хонобод аэродромига ташриф буюрган ҳарбийлар, Россия Федерациясидан келган меҳмонлар нутқ сўзлади.
Хонобод аэродромида Жануби-ғарбий махсус ҳарбий округидаги Ҳаво ҳужумидан мудофаа қўшинлари ва Ҳарбий ҳаво кучларига қарашли ҳарбий қисмда амалий парвоз машқлари ўтказилди.
Эслатиб ўтамиз, Global Firepower экспертлари ўтказган тадқиқотга кўра, Ўзбекистон армияси дунёнинг энг кучли 50 армияси рўйхатига киритилган ва Марказий Осиёдаги ҳарбий қудрати энг юқори давлат ҳисобланади.
Изоҳ (0)