Давлат солиқ қўмитаси аввалроқ ҳуқуқлари бузилгани Ахборот ва оммавий коммуникациялар агентлиги томонидан айтилган блогер Азизбек Ашурбоев билан боғлиқ вазиятни ўрганиб чиқди. Бу ҳақда қўмита раиси Беҳзод Мусаев маълум қилди.
Вазият тафсилотларини ўрганиш давомида Азизбек Ашурбоев томонидан ижтимоий тармоқлардаги ўз саҳифаларига реклама жойлаштириш билан боғлиқ 2019 йил 7 июндаги назорат тадбирини ўтказиш вақтида Миробод туман солиқ инспекцияси ходимлари О.Зиёев ва Ш.Ҳасанов ўз мансаб ваколатларини суиистеъмол қилиш ва солиқ органлари ходимларининг касбий ахлоқ қоидаларини бузиш ҳолатларига йўл қўйгани аниқланди.Аввалроқ Миробод туманида солиқчилар бир инстаблогернинг шахсий телефонини олиб қўйгани, Instagram’даги саҳифаси паролини ўзгартириб қўйгани ҳақида маълум бўлган эди. Кейинроқ Давлат солиқ қўмитаси раиси биринчи ўринбосари Мубин Мирзаев ўша инстаблогердан шахсан узр сўраган, Ахборот ва оммавий коммуникациялар агентлиги директори Комил Алламжонов эса блогерни қўллаб-қувватлаб чиққанди. Ўз навбатида, Бош прокуратура ҳам блогерларни қўллаб-қувватлашини эълон қилди.Азизбек Ашурбоев томонидан йўл қўйилган ҳуқуқбузарликни бартараф этиш учун у билан расмийлаштирилган материаллар асосида, шахсий уяли телефонини олиб қўймасдан, тушунтириш ишларини олиб бориш кифоя эди. Йўл қўйган камчиликлари учун кўрсатиб ўтилган ходимлар эгаллаб турган лавозимларидан озод этилди.
Келгусида шу каби ҳолатлар юзага келишига йўл қўймаслик мақсадида Давлат солиқ қўмитаси томонидан ўхшаш баҳсли вазиятларни масаланинг ҳар юридик, ҳам ахлоқий жиҳатларини ҳисобга олган ҳолда тартибга солиш механизмини жорий этиш масаласи кўриб чиқилмоқда.
Давлат солиқ қўмитаси ўз фаолиятининг очиқлиги таъминланишидан манфаатдордир ҳамда журанлист ва блогерлар билан яқин ҳамкорликда ишлашга, уларнинг фаолиятини қўллаб-қувватлашга, шунингдек, уларнинг қонуний ҳуқуқ ва манфаатларини ҳимоя қилишга тайёрлигини билдиради.
Беҳзод Мусаев, Давлат солиқ қўмитаси раиси
Изоҳ (0)