12 июнь куни Дарё — Live каналида «Бу — Қашқадарё вилояти Нишон тумани марказий шифохонасининг туғуруққача бўлган даволаниш бўлими» сарлавҳаси остида суратлар эълон қилингади. Унда Нишон тумани марказий шифохонасининг туғруққача бўлган даволаниш бўлимида аёллар коридорда ётгани, битта палатага 8—9 нафардан аёл жойлаштирилгани ёзилганди.
Соғлиқни сақлаш вазирлиги бу борада «Kun.uz»га расмий маълумот берди. Унда айтилишича, Нишон тумани марказий шифохонасининг ҳомиладорлар патологияси ва гинекология бўлимларида йўлакда ётиб даволанаётган беморлар аниқланмаган. Беморлар ўринларига жойлашувига қадар ўзлари ва қариндошлари ерга жой тўшаб ётиб олишган.
Баёнотда Нишон туман касалхонасининг туғруқ мажмуасида замонавий шароитлар яратилгани алоҳида таъкидланган.
«Бундай жиддий камчиликка йўл қўйгани, ўз ишига совуққонлик билан қарагани ва бўлимда назоратни сусайтиргани учун туман тиббиёт бирлашмаси бошлиғининг оналик ва болаликни муҳофаза қилиш бўйича ўринбосари М.Ҳалилова, туғруқ мажмуаси мудири вазифасини вақтинча бажарувчи Н.Сазанбаевалар вазифасидан озод этилди. Ҳомиладорлар патологияси бўлими врачи Б.Эсановага эса интизомий жазо қўлланилиб, ўртача иш ҳақининг 30 фоизи миқдорида жаримага тортилди. Шифохонада қатъий назорат ўрнатмагани, бундай муаммоларнинг олдини олиш бўйича ўз вақтида зарур чора кўрмагани учун туман тиббиёт бирлашмаси бошлиғи Й.Шоназаров огоҳлантирилди», — дейилади Соғлиқни сақлаш вазирлигининг хабарида.
Изоҳ (0)