Фарғонада фирибгарликни ўзига касб қилиб, одамларнинг миллионлаб маблағларини ишлатиб юборган ўқитувчи суд ҳукми билан 9 йил муддатга озодликдан маҳрум қилинди. Бу ҳақда ЎзА маълум қилди.
Қува тумандаги 60-умумтаълим мактаби ўқитувчиси Бекзод Муталиев осонгина пул топиш йўлини излаб, кўплаб одамларни чув туширди. 30 ёшли бу йигит 4 марта фирибгарлик билан судланган бўлса-да, асло хулоса чиқармади.
Б.Муталиевга жиноят ишлари бўйича Қувасой шаҳар судининг жорий йил 28 январдаги ҳукмига кўра, фирибгарлик жиноятини содир этгани учун 8 йил 6 ой озодликдан маҳрум қилиш жазоси тайинланди. У жазони ўташни бошлаганида 2016—2018 йилда содир этган бошқа жиноятлари ҳақида пушаймонлик аризасини ёзиб, ушбу жиноятлари учун ҳам мазкур ўтаётган жазосига қисман қўшиб жазо олишни ўйлади. Чунки фирибгарнинг тузоғига илинганлар кўп бўлиб, бир кун келиб, бари бир қилмишига яраша жазо олиши аниқ эди.
Бекзод Фарғона шаҳрида Б.Шокировнинг қизини қўшимча контрактга тўлаб, Фарғона давлат университетига ўқишга киритиб қўйишини айтиб алдайди. Ундан 12 минг АҚШ доллари олиб, ўз эҳтиёжига сарфлаган. Шунингдек, Р. Абдуллаевга тадбиркорлик билан шуғулланаётганини, фаолиятини янада ривожлантириши учун 5 минг доллар кераклигини айтиб пулни олиб шахсий эҳтиёжлари учун ишлатиб юборади.
Судда маълум бўлишича, у 15 та ҳолатда 209 миллион сўмдан ортиқ маблағни фирибгарлик билан қўлга киритган.
Жиноят ишлари бўйича Ёзёвон туман судининг ҳукмига кўра, Б.Муталиев Жиноят Кодексининг 168-моддаси 3-қисми «б» банди билан айбланиб, унга 59-модда 8-қисмига асосан узил-кесил тўққиз йил озодликдан маҳрум қилиш жазоси тайинланди.
Изоҳ (0)