Соғлиқни сақлаш вазирлиги: Тропикамид фақат шифокор рецепти асосида берилади

Ижтимоий тармоқларда Тропикамид дори воситасини Ўзбекистонда савдоси тақиқланган Трамадол, Лирика ўрнини босувчи дори сифатида талқин этилаётгани Соғлиқни сақлаш вазирлиги томонидан ўрганиб чиқилди. Бу ҳақда вазирликнинг Жамоатчилик билан алоқалар бўлими маълум қилди.

Вазирлик расмий баёнотига кўра, Тропикамид дори воситаси кўзга томизиш учун мўлжалланган бўлиб, қорачиқларни кенгайтириш хусусиятига эга, кўз касалликларида фойдаланилади.

Ушбу дори воситаси Соғлиқни сақлаш вазирлигининг 2018 йил 22 октябрдаги «Рецептсиз бериладиган дори воситалари рўйхатини тасдиқлаш тўғрисида»ги буйруғига кўра, шифокор рецепти асосида берилиши белгиланган.

Республика ихтисослаштирилган кўз микрохирургия илмий-амалий тиббиёт маркази директори Азамат Юсуповнинг айтишича, ундан қоидага хилоф равишда фойдаланиб, инъекция қилинганда қон томирлари кенгайиши туфайли сархушлик ҳолати юз беради.

Аммо қайд этилишича, Тропикамидни Лирика ва Трамадол каби психотроп дори воситалари билан тенглаштириб бўлмайди. Тропикамидда наркотик моддалар мавжуд эмас. Ушбу дори воситаси рецептсиз берилса, турли нохуш вазиятлар эҳтимоли кўпайиши мумкин. Шу сабабли, Тропикамид фақатгина шифокор рецепти асосида берилиши шарт.

Вазирлар Маҳкамасининг 2018 йил 27 октябрдаги «Гиёҳвандлик воситалари, психотроп моддалар ва прекурсорларни Ўзбекистон Республикаси ҳудудига олиб кириш, ундан олиб чиқиш ва транзит тарзида ўтказиш тартибини, шунингдек, уларнинг муомалада бўлиши юзасидан назоратни такомиллаштириш тўғрисида» 2015 йил 12 ноябрдаги қарорига ўзгартиришлар киритиш ҳақида»ги қарорида тасдиқланган гиёҳвандлик воситалари, психотроп моддалар ва прекурсорлар рўйхатларига Тропикамид дори воситаси номланиши бўйича киритилмаган.

Шу билан бирга, БМТнинг 1961 йилги гиёҳвандлик моддалари тўғрисидаги Ягона конвенцияси ва 1971 йилги психотроп моддалар тўғрисидаги конвенцияси талабларига мувофиқ тасдиқланган гиёҳвандлик воситалари ва психотроп моддалар рўйхатларига ҳам киритилмаган.

«Тиббиёт амалиётида ишлатишга рухсат этилган Тропикамид дори воситаси Давлат реестридан ‘Мидакс’, ‘Тропикамид’ номлари билан ўтказилган. Ушбу дори воситаси билан боғлиқ ноқонуний хатти-ҳаракатлар юз берган ҳолатларда, Соғлиқни сақлаш вазирлигига ҳуқуқ-тартибот органлари томонидан келиб тушаётган мурожаатлар асосида, Наркотикларни назорат қилиш Давлат комиссияси томониданрўйхатга киритилиши тўғрисидаги масала кўриб чиқилади», — дейилади хабарда.