Туман (шаҳар) ҳокимликларида ва олий таълим муассасаларида тузилган комиссияларга ҳозирги кунда жами 468 нафар номзод «Инновацион ғоялар етакчиси» кўкрак нишони учун ҳужжат топширди. Бу ҳақда Инновацион ривожланиш вазирлиги маълумотига таяниб, Spot хабар берди.
Ушбу кўкрак нишони инновацион ғоя ва технологияларни ривожлантириш ва уларни амалиётга татбиқ этишга муносиб ҳисса қўшган ёш олимлар ва талабалар ҳамда ташаббускор фуқароларнинг инновацион фаолиятини рағбатлантириш ва эришган ютуқларини муносиб тақдирлаш мақсадида берилади.
Кўкрак нишони билан тақдирлашга оид дастлабки таклифларни қабул қилиш бўйича 1 апрелдан 30 апрелгача республиканинг барча туман ҳокимликларида ва олий таълим муассасаларида қабул комиссиялар тузилган.
Қорақалпоғистон Вазирлар Кенгаши, вилоятлар ва Тошкент шаҳар ҳокимликлари тақдим этилган таклифларни мазкур ҳудуд ёки республика иқтисодиёти тармоқлари ва ижтимоий соҳа эҳтиёжларидан келиб чиқиб, инновацион ғоя ва технологияларни ушбу ҳудудга ёки республика иқтисодиётига татбиқ этиш даражасини ҳисобга олган ҳолда ўрганиб чиқади.
Шундан сўнг 3 нафардан тавсия қилинган номзодларнинг ҳужжатларини 20 июнгача Инновацион ривожланиш вазирлигига тақдим этади.
Изоҳ (0)