Қашқадарё вилояти Ахборот ва оммавий коммуникациялар бошқармасига янги бошлиқ тайинланди

12 июнь, чоршанба куни Қарши шаҳридаги «Ҳаёт» меҳмонхонасида бўлиб ўтган йиғилишда Қашқадарё вилояти Ахборот ва оммавий коммуникациялар бошқармасининг янги бошлиғи Усмон Нусуров вилоятда фаолият юритувчи ОАВ вакиллари ва журналистларга таништирилди. Бу ҳақда «Дарё» мухбири хабар бермоқда.

Маълум бўлишича, Усмон Нусуров Президент Администрацияси ҳузуридаги Ахборот ва оммавий коммуникациялар агентлиги директори Комил Алламжоновнинг 2019 йилнинг 29 майдаги буйруғига асосан 1 июнь кунидан иш бошлаган. Бу вазифада илгари Ботиржон Мусурмонов фаолият юритган. Собиқ бошлиқ бошқа ишга ўтаётганлиги сабаб ушбу вазифадан ўз аризасига кўра озод этилган.

Усмон Нусуров айни лавозимга тайинлангунига қадар давлат рақобат қўмитасининг «Бизнес Daily» ноширлик уйи раҳбари сифатида иш юритган.

Маълумот ўрнида: вилоятда айни кунда 39 номдаги газета, 4 та журнал, 2 та телевидение, 2 та радио ва 4 та сайт фаолият юритмоқда.