«Ипотекабанк» Самарқанд вилоят филиалида пулларни талон-торож қилиш ҳолати аниқланди. Бу ҳақда Мажбурий ижро бюроси Булунғур туман бўлими бошлиғи Шавкат Тожибоев «Дарё»га маълум қилди.
Мажбурий ижро бюроси Булунғур туман бўлимида жойлашган «Ипотекабанк» АТИБ Самарқанд вилоят филиалининг 30-сонли жамғарма кассасида 2017–2019 йиллар давомида энергия ресурслари тармоғидан узилган 39 нафар истеъмолчи томонидан тармоққа қайта уланиш 14 миллион 898 минг сўм пул тўланган. Бўлим давлат ижрочилари иш юритувида мавжуд бўлган ижро ҳужжатлари бўйича 46 нафар фуқаро томонидан давлат фойдасига тўланган 8 миллион 938 минг сўм пул маблағлари учун банк муҳри туширилган тўлов квитансиялари берилган. Бироқ ўрганиш давомида бу пуллар банк касса дастурига кирим қилинмасдан ўзлаштириб юборилган.
Бундан ташқари, 19 та ижро ҳужжатларига қўшилган тўлов квитансиялари билан банк филиалида мавжуд бўлган тўлов квитансиялари таққослаб кўрилганда 6 миллион 410 минг сўм пул маблағлари учун банк муҳри туширилган тўлов квитансиялари борлиги аниқланган. Лекин банк филиалида худди шу ижро ҳужжатлари учун 593 минг сўмлик банк муҳри туширилган сохта тўлов квитансиялари аниқланган. Натижада 5 миллион 616 минг сўм фарқни ташкил қилган.
«Ипотекабанк» АТИБ Самарқанд вилоят филиалининг жамғарма касса ходимлари Ж.Қ. ва Ҳ.А.лар давлат фойдасига ундирилиши лозим бўлган 29 миллион 453 минг сўм пулларни ўзлаштириш йўли билан талон-тарож қилган.
Мазкур ҳолат юзасидан Мажбурий ижро бюроси Булунғур туман бўлими томонидан Ўзбекистон Республикаси Жиноят Кодексининг 167-моддаси (Ўзлаштириш ёки растрата қилиш йўли билан талон-торож қилиш) 2-қисми «в» банди билан жиноят иши қўзғатилиб, туман прокуратурасига юборилган.
Изоҳ (0)