Леонардо да Винчининг «Олам қутқарувчиси» номли картинаси Саудия Арабистонининг меросхўр шаҳзодаси Муҳаммад ибн Салмоннинг Serene яхтасида сақланмоқда. Бу ҳақда ArtNet журналистига таяниб, Forbes хабар берди.
Мазкур картина бунга қадар «Уралкалия»нинг собиқ акциядори, россиялик миллиардер Дмитрий Риболовлевга тегишли бўлган. Бизнесмен «Олам қутқарувчиси»ни швейцариялик арт-дилер Ива Бувьедан харид қилган. 2016 йилда Риболовлев Бувье билан судлашиб, арт-дилерни картина ва ҳайкалтарошлик намуналарини қиммат нархда сотганликда айблаган. Хусусан, Бувье Леонардо да Винчининг картинасини 80 миллион долларга харид қилиб, Риболовлевга 127,5 миллион долларга сотган.
Риболовлеv харидлар асносида йўқотган жами маблағлари 1 миллиард долларга тенглигини маълум қилган.
2017 йилнинг ноябрида Риболовлев «Олам қутқарувчиси»ни кимошди савдосига қўйиб, рекорд даражадаги сумма — 450,3 миллион долларга сотган. Харидор кимлиги сир сақланган эди.
Кейинроқ Абу-Даби туризм ва маданият департаменти кимошди савдосида харид қилинган «Олам қутқарувчиси» Абу-Даби Луври номини оладиган янги музейнинг коллекциясидан ўрин олишини билдирган. Да Винчининг картинаси 2018 йилнинг сентябрида намойиш этилиши керак эди, бироқ номаълум сабабларга кўра намойиш қолдирилган. Март ойининг охирида эса «Олам қутқарувчиси» Абу-Даби Лувридан изсиз йўқолгани маълум бўлган.
Ҳозирда кимошди савдоларида сотилган дунёдаги энг қиммат картина Саудия Арабистони шаҳзодасининг яхтасида сақланилаётгани айтилмоқда.
Изоҳ (0)