Қашқадарёда Польша инвестиция дастури асосида қиймати 8 миллион долларига тенг, йиллик қуввати 8 милллион дона in-vitro усулида картошка уруғликларини кўпайтиришга ихтисослашган лаборатория ҳамда йилига 5 минг тонна соғлом картошка уруғликлари етиштиришга мўлжалланган комплекс ташкил этилиши режалаштирилмоқда. Бу ҳақда «Дарё»га Қишлоқ хўжалиги вазирлиги матбуот хизмати маълум қилди.
Бу ҳақда Қишлоқ хўжалиги вазирлигида Польша—Ўзбек Савдо-саноат палатаси, Польша Картошка уруғчилиги ва ҳимоя қилиш институти, «Замарте картошка етиштириш» МЧЖ, Сабзавот, полиз экинлари ва картошкачилик илмий-тадқиқот институти, Қишлоқ хўжалигини стандартлаштириш маркази, Биорганик кимё институти вакиллари иштирокида ташкил этилган учрашувда маълум қилинди. Унда мазкур лойиҳани амалга ошириш, Ўзбекистон ва Польша ўртасида картошка уруғчилиги соҳасидаги ҳамкорлик алоқаларини ривожлантиришга қаратилган масалалар муҳокама этилди.
—Мазкур лойиҳанинг амалга оширилиши натижасида мамлакатда картошка уруғи импортига бўлган эҳтиёж ички имкониятдан қопланиши, аҳолини иш билан таъминлаш, картошка уруғи сифатининг яхшиланишига эришилади. Ҳозирги кунда фермер хўжаликларини соғлом, вируслардан ҳоли картошка уруғликлари билан таъминлаш мақсадида Польша билан ҳамкорликда тизимли ишлар амалга оширилмоқда, — дейди Қишлоқ хўжалиги вазири ўринбосари Саидкамол Хўжаев.
Жорий йилда Ўзбекистонда 135 минг гектар ҳудудда 2,8 миллион тонна картошка етиштириш режалаширилган. Бугунги кунда Ўзбекистонга турли хорижий давлатлардан ҳар йили ўртача 20-30 минг тонна картошка уруғликлари импорт қилинмоқда. 2017 йилда Афғонистон, Беларусь, Эрон, Қозоғистон, Россия, Туркия, Покистон сингари давлатлардан қиймати 23 551 долларга тенг 193 622 тонна картошка импорт қилинган бўлса, 2018- йилда бу кўрсаткич 224 674 тоннани ташкил этган.
Изоҳ (0)