«NasafNews.uz» нашри Қашқадарё вилоятининг Косон шаҳрида жойлашган деҳқон бозоридаги тартибсизликлар ҳақида мақола эълон қилинди. Қуйида ушбу мақоланинг тўлиқ шакли келтирилган.
Рўзғор буюмлари хариди учун ўзингизга яқин ҳудудда жойлашган бозорга отландингиз, маҳсулотларни сотиб олиш учун савдогарга юзландингиз, аммо шу пайтда савдогар ва харидор ўртасида тартибсизлик туфайли низо келиб чиқди.
Бунга ким айбдор? Сотувчилар учун шароит яратмаган бозор маъмуриятими ёки ноқонуний эканини билса-да фаолият олиб бораётган тадбиркорми? Қашқадарё вилояти Косон туманидаги марказий деҳқон бозори ва буюм бозори атрофида юзага келган тартибсизликларни кўриб шундай хаёлга келасан киши!
Чиндан ҳам бир неча йиллардан бери бу бозорларнинг тартибга келганини ҳеч ким эслолмайди. Ҳамма ўзи билганича савдо-сотиқ ишларини олиб боради. Харидорларга ҳам фарқи йўқ. Тоза бўладими ёки кир-чир ҳар қандай маҳсулотларни сотиб олишади. Жойида истеъмол ҳам қилиб кетаверишади. Албатта, бунга кичик-кичик ёйма умумий овқатланиш масканлари (чойхоналар)нинг ҳам ҳиссаси бордек назаримизда.
Майли маҳсулотларни сотиш ва сотиб олиш масаласини четга қўйиб турайлик: Ҳайдовчилар ва пиёдаларнинг тартибсиз ҳаракатини асосий масалага кўтарсак, «бу ҳамма бозорларда борку» деб энсангиз қотиши турган гап.
Аммо ҳамма бозорларнинг қонун-қоидасида «йўл қоидасига амал қилинмасин» деган гап йўқку! Косондаги энг тирбанд жой шу ер эканини ҳамма билади. Баъзан бу тирбандликлар натижасида йўл транспорт ҳодисалари ҳам содир бўлиб туради. Хуллас, ҳайдовчи ва пиёда билиб туриб хоҳлагандек йўл қоидаларини бузиб кетаверишади. Буни афсуски, йўл ҳаракати хавфсизлиги ходимлари назорат қилишга «кучи етмайди»
Изоҳ (0)