Бухоро шаҳрида ўтказилаётган кураш бўйича Президент соврини учун Баҳоуддин Нақшбанд хотирасига бағишланган I халқаро турнирга уч қитъадан 100 нафардан ортиқ полвон келди. Бу ҳақда «Дарё» мухбири хабар бермоқда.
Вилоят кураш федерацияси ижрочи директори Савриддин Умаровнинг билдиришича, мусобақанинг умумий соврин жамғармаси 70 минг АҚШ долларини ташкил этади. Мусобақада ўз вазн тоифасида биринчи ўринни эгаллаган полвонлар олтин медаль ва 3 минг доллар пул мукофоти билан тақдирланади. Иккинчи ўрин соҳибларига кумуш медаль билан бирга 2 минг доллар берилади. Учинчи ўринни эгаллаган икки спортчининг ҳар бирига бронза медали ва 1 минг долларлик пул мукофоти топширилади.
Турнирда беллашувларни катта тажрибага эга халқаро тоифадаги ҳакамлар бошқариб боради.
— Ўзбекистонда ҳар йили учтадан йирик мусобақа ўтказишни режалаштирганмиз. Кейинги режаларимизга кўра, кураш мусобақалари Лондон ва Парижда ўтказилади. Бундан ташқари, Ўзбекистонда нуфузли кураш академияси ҳам ташкил этилади, — дейди Кураш халқаро ассоциацияси вице-президенти Комилжон Юсупов.
«Бухоро» спорт мажмуасида ўтказилаётган халқаро турнирнинг тантанали очилиш маросимида вилоят ҳокими Ўктам Барноев, Жисмоний тарбия ва спорт вазири ўринбосари Ойбек Қосимов ва бошқалар иштирокчиларни қутлади.
Изоҳ (0)