Инновацион ривожланиш вазирлиги Tech Central Asia акселерацион дастурига топширилган қурилиш материалларни ишлаб чиқариш бўйича лойиҳаларга алоҳида эътибор қаратмоқчи. Бу ҳақда вазирлик раҳбари ўринбосари Азимжон Назаров маълум қилди, дея хабар бермоқда «Дарё» мухбири Мусулмонбек Иброҳимов.
Инновацион ривожланиш вазирлиги Ўзбекистондаги АҚШ элчихонаси ҳамда Astana Business Campus билан ҳамкорликда Ўзбекистондаги технологик стартап лойиҳалар учун Tech Central Asia акселерацион дастурини ўтказди. Ушбу дастур Ўзбекистон, Қозоғистон, Қирғизистон ва Тожикистонда ўз cтартап лойиҳаларини ишлаб чиқиш ва уларни амалга оширишни истаганларга барқарор бизнесларини барпо этиш ҳамда уларнинг кейинги ривожланишига кўмак беради.
Вазир ўринбосари Азимжон Назаровнинг таъкидлашича, дастур доирасида кўпроқ қурилиш материалларини ишлаб чиқариш ва қишлоқ хўжалиги соҳасига алоқадор стартаплар алоҳида қўллаб-қувватланади.
«Ҳамкорлар билан келишган ҳолда, кўпроқ эътиборни қурилиш материалларини ишлаб чиқариш ва қишлоқ хўжалигидаги стартапларга йўналтиришни келишиб олдик. Мақсадимиз — танлов якунларига кўра илмий-техник кенгашга қурилиш материалларини ривожлантириш бўйича лойиҳаларни таклиф қилиш. Чунки кўплаб қурилиш материалларининг хом ашёси ўзимизда бўла туриб, четдан импорт қилиб олиб келинмоқда. Бугунги кунда Ўзбекистоннинг деярли барча ҳудудларида бунёдкорлик ишлари кетмоқда. Табиийки, бу қурилиш материалларига бўлган талабни оширади», — дейди вазир ўринбосари.
Назаровнинг қўшимча қилишича, қурилиш материаллари ишлаб чиқариш бўйича амалиётга татбиқ этиладиган лойиҳаларнинг бевосита бозорга кириб бориши ва экспорт имкониятларига эга бўлиши эҳтимоли юқори.
«Танлаб олинган лойиҳа Марказий Осиё бозорига эга бўлади. Яъни, Ўзбекистонда 33 миллион аҳоли бўлса, қўшни тўртта давлатни қўшадиган бўлсак, 70 миллондан ортади. Демак, биринчи навбатда, биз бунда экспортга ҳамда шу билан бирга стартап лойиҳани тезроқ бозор кўришига ва ривожланишига ҳам эришамиз», — деди вазирлик вакили.
Қайд этилишича, энг яхши технологик ечимларнинг муаллифлари Нур-Султон (Остона) шаҳридаги Назарбоев университетида ўтказиладиган дастурнинг якуний Demo Day тадбирида иштирок этиш учун таклиф этилади. Бу ерга таклиф этилган стартапчилар ўз ғоялариини амалга жорий этиш учун маблағ жалб этиш, шунингдек, Назарбаев университетининг ABC Quick Start инновацион кластери акселерация дастурига ариза топшириш имкониятига эга бўлади. Бу билан лойиҳани амалга ошириш учун инвесторлар топилади.
Изоҳ (0)