Россиянинг «Муз TV» телеканали «Отпуск без путёвки» кўрсатуви ижодкорлари лойиҳанинг навбатдаги сонини суратга олиш учун 8—15 июнь кунлари Ўзбекистонга ташриф буюради. Бу ҳақда Ўзбекистоннинг Россиядаги элчихонаси матбуот хизмати маълум қилди.
Ташриф давомида телеканал ижодий жамоаси асосий диққатга сазовор жойларни суратга олиш учун Тошкент, Самарқанд, Бухоро ва Хива каби шаҳарларда бўлади.
Лойиҳа Ўзбекистоннинг Россиядаги элчихонаси ва Туризмни ривожлантириш давлат қўмитаси ҳамкорлигида тайёрланмоқда. Дастур томошабинларга Ўзбекистоннинг сайёҳлик салоҳияти, унинг тарихи, маданияти, анъаналари ва замонавий ҳолати, миллий таомлар ва маҳаллий усталар ижоди билан танишиш имконини беради.
Маълумот учун, «Отпуск без путёвки» кўрсутуви «Муз TV» телеканалида 2018 йил апрелидан бери эфирга узатилмоқда. Кўрсатув бошловчиси Андрей Разиграев хорижий давлатларнинг маданияти, анъаналари ва сайёҳлик салоҳиятини ўрганиб, баён қилади.
Борилган ҳар бир жойда албатта ташриф буюриш керак бўлган диққатга сазовор жойлар бешлиги тузилади. Кўрсатувчинг аввалги сонлари Озарбайжон, Германия, Грузия, Италия, Қозоғистон, Марокаш, БАА, Туркия каби давлатлар ҳақида бўлган.
Изоҳ (0)