Андижон шаҳридаги Алишер Навоий номидаги маданият ва истироҳат боғида «Андижонни кўркам ва обод вилоятга айлантирайлик!» шиори остида ўтказилган кўрик-танлов якунларига бағишланган гуллар байрами бўлиб ўтди. Бу ҳақда «Дарё» мухбири хабар бермоқда.
Вилоят ҳокимининг ёшлар сиёсати масалалари бўйича ўринбосари Ўткирбек Шукуровнинг маълум қилишича, ҳар йили Мустақиллик байрам олдидан ўтказиб келинаётган кўрик-танловнинг асосий мақсади бунёдкорлик ва ободонлаштириш борасидаги илғор ташаббусларни қўллаб-қувватлаш, оммалаштириш, эл-юрт фаровонлиги йўлидаги эзгу ишларда аҳоли, айниқса, ёш авлоднинг фаол иштирокини таъминлаш, қишлоқ, маҳалла, ташкилот ва муассасаларда тозалик-орасталик, кўкаламзорлаштириш ишларини кенг йўлга қўйишдан иборат.
Танлов мобайнида хонадонлар, кўп қаватли турар жой бинолари атрофининг озодалиги, саранжом-саришталиги, ҳудудларни ижтимоий-иқтисодий ривожлантириш, янги иш ўринлари яратиш бўйича олиб борилаётган ишлар, шунингдек, халқ амалий санъати ва миллий ҳунармандликни кенг намойиш этишга алоҳида эътибор қаратилган ҳамда махсус ҳакамлар ҳайъати томонидан баҳолаб борилган.
Кўрик-танлов якуни доирасида вилоят марказида ташкил этилган гуллар байрамида вилоят маданият, спорт, халқ таълими, касб-ҳунар коллежлари, мактабгача таълим, соғлиқни сақлаш муассасалари ҳамда олий ўқув юртлари, тадбиркорлар ва ҳунармандлар томонидан кўргазмалар намойиш этилди.
Вилоятнинг шаҳар ва туманларидан келган гулчилар ўз меҳнат маҳсулларини намойиш этди.
— Гулчилик билан 1992 йилдан буён шуғулланаман, — дейди Андижон тумани, Қўшариқ маҳалласидан Азимжон Долимов. – Бунга оғир хасталикка учраб гул жозибаси — «гул терапияси» орқали соғайиб кетганим сабаб бўлди. Ҳозирда 3,5 сотихли иссиқхонада 40 турдаги ноёб турларини етиштирмоқдаман. Сурхондарё, Қашқадарё, Қўқон ва бошқа ҳудудлардан харидорлар келишмоқда.
Фестиваль якунида Қўрғонтепа тумани «Энг обод туман», Пахтаобод тумани, Учкўза маҳалласи «Энг кўркам маҳалла» номинацияларида ғолиб деб топилди. Вилоят халқ таълими бошқармаси, Ўзбекистон ёшлар иттифоқи вилоят кенгаши ҳамда Давлат санитария-эпидемиология назорати маркази алоҳида фаоллиги учун махсус номинациялар билан тақдирланди.
Вилоят ҳокими Шуҳратбек Абдураҳмонов ғолиб ва совриндорларни тақдирлаш маросимида мазкур фестиваль бундан кейин ҳар йили май ойининг учинчи декадасида мунтазам равишда ташкил этилишини маълум қилди.
Кеч оқшомга қадар давом этган фестиваль боғнинг ёзги амфитеатрида ўтган Ўзбекистонда хизмат кўрсатган артист Камолиддин Ўринбоев бошчилигидаги Ўзбекистон ёшлар симфоник оркестрининг концерт дастури билан якунланди.
Изоҳ (0)