Трамп: КХДР раҳбари ҳали ҳам АҚШ билан ядросизлантириш битимини имзолашга тайёр

Трамп КХДР раҳбари ҳали ҳам АҚШ билан Корея ярим оролини ядросизлантириш битимини имзолашга тайёр, деган фикрда. «ТАСС»нинг ёзишича, бу ҳақда Дональд Трамп 5 июнь куни Ирландия бош вазири Лео Варадкар билан учрашувда журналистлар берган саволга жавоб берганда айтган.

Трампнинг ўзи ҳам бу битимни имзолаш тарафдори эканлигини маълум қилиб, «тегишли вақтда у билан учрашувни интизорлик билан кутишини» билдирган.

Сингапурда 2018 йилда Трамп ва Ким Чен Ин тарихда биринчи марта ўтказган АҚШ ва КХДР саммити якунида ҳамкорликда ҳужжат имзоланган эди. Унга кўра, Вашингтон томонидан хавфсизликни таъминлаш кафолати эвазига Пхеньян Корея ярим оролини ядродан ҳоли этиш мажбуриятини олган эди.

Иккинчи саммит 27— 28 февралда Ханойда бўлиб ўтган, лекин унда ҳеч қандай келишувга эришилмаган.