АҚШ президенти Дональд Трамп Жанубий Корея The Chosun Ilbo газетасининг КХДР Давлат кенгаши махсус вакили Ким Хёк Чхолнинг АҚШ сиёсатига муносабати юзасидан қатл этилгани ҳақидаги хабарлар ростлигига шубҳа билдирди. «ТАСС»нинг ёзишича, бу ҳақда Дональд Трамп 5 июнь куни Ирландия бош вазири Лео Варадкар билан учрашувда журналистлар берган саволга жавоб берганда айтган.
«Мен бу хабарлар рост ёки ёлғонлигини билмайман. Чунки биз музокара ўтказган шимолий кореялик кишилардан бирини жуда кучли шахс сифатида яхши биламиз. Улар бу шахс ўлдирилганини айтиб, бунда дарҳол Ким Чен Инни айблашмоқчи. Лекин бундай эмас. У яқинда теартга ташриф буюрган эди. Шу сабабли у ўлдирилмаган. Қолган тўрт нафар шахслар ҳақида ҳеч нарса билмайман», — деган Трамп.
Май ойи охирида Жанубий Кореянинг The Chosun Ilbo газетаси АҚШ билан музокараларга масъул бўлган Ким Ён Чхол ўз лавозимидан бўшатилиб, мамлакат шимолидаги провинциялардан биридаги каторгага юборилганини маълум қилган.
Бундан ташқари, газета АҚШ билан Ханой саммити муваффақиятсиз якунланганидан сўнг учрашувни олий даражада тайёрлаган КХДРнинг тўрт нафар дипломати ҳамда КХДР Давлат кенгаши махсус вакили Ким Хёк Чхолнинг қатл этилганини таъкидлаган.
Жанубий Корея газетаси, шунингдек, КХДР етакчисининг синглиси Ким Ё Чжоннинг Трамп билан учрашув муваффақиятсиз ўтгани учун жазо сифатида уй қамоғига ҳукм қилинганини ҳам айтган.
Шимолий Корея бош ахборот агентлиги (Корея марказий телеграф агентилиги — КМТА) бундай хабарлардан сўнг , КХДР раҳбарининг синглиси Ким Ё Чжон ва унинг ёрдамчиси Ким Ён Чхолнинг яқинда бўлиб ўтган тадбирда бирга тушган суратлари илова қилинган мақола чоп этган.