Рамазон ҳайити арафасида Наманган шаҳридаги «Ҳидоя» ўрта махсус ислом билим юртининг янги ўқув биноси, спорт зали ва анжуманлар зали фойдаланишга топширилди. Бу ҳақда «Дарё» мухбири Азизбек Абдувалиев хабар бермоқда.
Бунга бағишланган маросимда сўзга чиққан вилоят ҳокими Хайрулло Бозоровнинг қайд этишича, давлат раҳбари 2018 йили вилоятга ташрифи чоғида «Ҳидоя» билим юрти жойлашган ҳудудни диний-маърифий мажмуага айлантириш юзасидан кўрсатма берган. Шундан сўнг бу ерда амалга оширилган бунёдкорлик ишларига 10 миллиард сўм маблағ сарфланди ва 3 та кошона қад ростлади. Қолаверса, вилоятда Ислом академиясининг малака ошириш маркази филиали ҳам фаолият кўрсатиши кўзда тутилган.
3 қаватдан иборат ўқув биноси кенг, шинам ва ёруғ синф хоналари, кутубхона, маънавият ва маърифат, лингафон, сўнгги русумдаги компьютерлар билан жиҳозланган информатика хоналаридан иборат.
Ювиниш, кийиниш, тиббиёт ва мураббийлар хоналарига эга 18х30 ҳажмдаги спорт залида талабалар спортнинг волейбол, баскетбол, стол тенниси, тош кўтариш, кураш ва шахмат турлари бўйича шуғулланиши учун шароитлар яратилган.
200 ўринли анжуманлар зали эса турли маънавий-маърифий тадбирлар, мажлислар ўтказиш учун барча имкониятларга эга.
—Ўзим шу билим юртини 2002 йилда тамомлаганман. Шундан бери бу даргоҳда Қуръони карим ва тажвиддан талабаларга сабоқ бериб келаман. Шаҳарнинг Оромгоҳ даҳасидаги 5,7 гектарли энг баҳаво ҳудудида жойлашган «Ҳидоя» майдони, яратилган қулайликлари жиҳатидан мамлакатдаги 9 та ислом билим юрти орасида пешқадами саналади. Бу шароитлар талабаларимизга ҳам ўзининг ижобий таъсирини кўрсатади, албатта. Улар орасида мамлакатимиз ва Малайзия, Миср, Эрон, Кувайт ҳамда Саудия Арабистонидаги Қуръон мусобақаларида муваффақиятли иштирок этиб келаётган шогирдларимиз борлигидан фахрланамиз, — дейди Ўзбекистон мусулмонлари идораси вилоят вакилининг ўринбосари Обидхон Икромов.
Ҳозирда билим юртида 30 нафар ўқитувчи 160 нафар талабага сабоқ бериб келмоқда.
Ҳар йили ўқув юртида бир ўринга 8-10 нафар илм талабгорлари даъвогарлик қилиб келади ва бу ҳам билим юртлари орасида юқори кўрсаткичлардан ҳисобланади.
Янги биноларни фойдаланишга топшириш маросимида Вазирлар Маҳкамаси ҳузуридаги Дин ишлари бўйича қўмита раисининг биринчи ўринбосари Музаффар Комилов, Ўзбекистон мусулмонлари идораси раисининг маслаҳатчиси Абдулҳаким қори Матқулов, вилоят бош имом-хатиби Абдулҳай қори Турсунов сўзга чиқиб, талабалар ва йиғилганларни мазкур гўзал мажмуа ҳамда Рамазон ҳайити билан муборакбод этди.
Изоҳ (0)