Давлат раҳбарининг «Тадбиркорлик фаолиятини қўллаб-қувватлаш ва ҳимоя қилиш тизимини тубдан такомиллаштириш чора-тадбирлари тўғрисида»ги фармони ижросини таъминлаш мақсадида тузилган республика ишчи гуруҳи Бухоро вилоятида тадбиркорлар билан учрашувлар ўтказмоқда.
Ишчи гуруҳининг Когон туман ҳокимлиги биносида Бухоро, Когон шаҳарлари ва туманлари ҳамда Қоровулбозорда фаолият юритаётган ишбилармонлар билан дастлабки мулоқотида Жанубий Кореянинг Инчон шаҳри Korea medical fund Sangwon Clinik Himchan клиникаси маъмурияти бўлим бошлиғи Ким Кю Ёнг мурожаат қилди. Гап шундаки, Бухоро шаҳрида мазкур клиниканинг филиали барпо этилди. Эътиборлиси, кореялик инвесторлар бу лойиҳа рўёби учун 6 миллион АҚШ доллари миқдорида тўғридан тўғри сармоя киритмоқда. Шунинг 3 миллион АҚШ долларини замонавий тиббий асбоб-ускуналар ташкил этади.
—Биз бу ускуналарни Ўзбекистон бозорида сотиш эмас, балки аҳолига жаҳон андазалари даражасида тиббий хизмат кўрсатиш учун олиб келяпмиз, — дейди Ким Кю Ёнг. — Аммо биздан бунинг учун кўплаб ҳужжатлар талаб қилишяпти, ортиқча сарф-харажатларга қоляпмиз.
Суриштирув шуни кўрсатдики, бу масалада божхона тизимида ҳеч қандай муаммо йўқ. Фақат мазкур тиббий асбоб - ускуналар тегишли тартибга кўра, Соғлиқни сақлаш вазирлиги томонидан олти ой муддат ичида рўйхатдан ўтказилиши лозим экан. Шу «олти ой муддатда» деган ёзув хорижий инвесторнинг қўлини боғлаб турибди.
Уларни рўйхатдан ўтказиш учун нега ўн ёки йигирма кун кифоя қилмайди? Қолаверса, республикада ноёб саналган бу тиббий жиҳозлар қанча тез олиб кирилса шунча яхши эмасми? Ишчи гуруҳи масалага шу нуқтаи назардан ёндашиб, масалани республика даражасида ҳал этишга киришди.
Изоҳ (0)