ЮНИСEФнинг Ўзбекистондаги ваколатхонасининг раҳбари Саша Грауман Суриядан болаларнинг Ўзбекистонга қайтарилиши бўйича баёнот берди, бу ҳақда ЎзА хабар қилади.
Баёнотга кўра, ЮНИСEФ Ўзбекистон Республикасининг Суриядан Ўзбекистон фуқаролари бўлган болаларни ва Ўзбекистон фуқароларининг Сурия давлатида туғилган болаларини Ўзбекистонга олиб келганини қўллаб-қувватлайди.
Саша Грауман Ўзбекистон болаларни фуқароликсиз қолишига йўл қўймагани оқилона ишлигини айтмоқда.
Болаларнинг кўпчилиги нотинч, конфликтли ҳудудларда таваллуд топган ёки ўз ота-оналари билан у ерларга бориб қолишган.
Норасидалар ичида асосан ўғил болалар қуролли кучлар томонидан ўзгаларга зўравонлик қилишга мажбурланган. Уларнинг ҳуқуқлари топталган ва бу болалар катта бир фожианинг қурбонларидир. Уларга жиноятчи эмас, балки ҳуқуқлари топталган қурбонлар сифатида ёндашиш тўғри бўлади.
Яъни:
— Қуролли гуруҳлар томонидан таъқиб қилинган болалар ҳибсга олинмайди ва суд ишларига жалб этилмайди.
— Болаларга руҳий-ижтимоий мадад берилиши ва юридик ёрдам кўрсатилиши лозим.
Болалар қуролли кучлар ишлатилаётган конфликт ҳудудларидан келаётгани сабабли улар даҳшатли фожиали воқеаларга гувоҳ бўлган бўлиши ёки ўзлари зўравонлик қилишга мажбур бўлган бўлиши мумкин.
Шу сабабли кўпгина болаларга махсус руҳий-ижтимоий консултация берилиши лозим, дея таъкидланади Саша Грауманнинг баёнотида.
Шу муносабат билан ЮНИСEФнинг Ўзбекистондаги ваколатхонаси Ўзбекистон Республикасига аввал қуроли гуруҳлар таъсирида, конфликтли вазиятларда бўлган болаларга халқаро меъёрлар асосида руҳий-ижтимоий ёрдам кўрсатишда ҳамкорлик қилишга тайёрлигини билдирди.
Эслатиб ўтамиз, Ўзбекистон Республикаси Президенти Шавкат Мирзиёевнинг топшириғига биноан, 156 нафар Ўзбекистон фуқароси асосан аёллар ва болалар Яқин Шарқдаги қуролли можаролар ҳудудидан Ватанга қайтарилди. Улар 30 май куни махсус авиарейсда Тошкент шаҳрига олиб келинди.
Изоҳ (0)