Шавкат Мирзиёев электротехника саноатини ривожлантириш бўйича янги қарор имзолади

Ўзбекистон Республикаси президенти «Электротехника саноатини янада ривожлантириш учун қулай шарт-шароитлар яратиш ва тармоқнинг инвестициявий ҳамда экспорт салоҳиятини ошириш бўйича қўшимча чора-тадбирлар тўғрисида»ги қарорни имзолади.

Ҳужжат билан қуйидагилар электротехника саноатини ривожлантиришнинг асосий йўналишлари этиб белгиланди:

• ички бозор эҳтиёжларини ҳисобга олган ҳолда импорт ўрнини босувчи, энергия тежамкор, арзон ва сифатли электротехника ва электромаиший маҳсулотлар ишлаб чиқариш;
• мавжуд хом ашёни чуқур қайта ишлаш жараёнларига илғор технологияларни жорий этиш, юқори қўшилган қийматли тайёр маҳсулотлар ишлаб чиқаришни кенгайтириш ва диверсификациялаш;
• электротехника саноати тармоғи ва иқтисодиётнинг бошқа тармоқлари ўртасидаги ўзаро кооперация алоқаларини ривожлантириш ва шу орқали электротехника саноатида ишлатиладиган бутловчи қисмлар ва асбоб-ускуналар ишлаб чиқаришни маҳаллийлаштириш даражасини ошириш;
• электротехника саноати тармоғига сифат менежментининг замонавий усулларини ва халқаро стандартларни жорий этиш, маҳаллий ишлаб чиқарилаётган маҳсулотларни халқаро талабларга мувофиқ сертификатлаштириш тизимини яратиш;
• электротехника саноатида янги турдаги истиқболли маҳсулотлар ишлаб чиқариш, илмий-тадқиқот ва тажриба-конструкторлик ишланмаларни ва инновацион ғояларни жорий этиш.

Электротехника саноатини ривожлантиришга кўмаклашиш бўйича ишчи гуруҳи тузилди ва унга қуйидаги асосий вазифалар юклатилди:

 

• электротехника саноатида мис ва бошқа хом ашё қайта ишлашни чуқурлаштиришга, юқори қўшилган қийматли маҳсулотлар ишлаб чиқаришни кенгайтиришга кўмаклашиш;
• ишлаб чиқарилаётган электротехника ва электромаиший маҳсулотлар таннархини ҳамда уни пасайтириш имконини чеклаётган ҳолатларни таҳлил қилиш, маҳсулотлар рақобатбардошлигини ошириш бўйича таклифлар тайёрлаш;
• тармоқ ва тармоқлараро кооперацияни ривожлантириш, импорт ўрнини босувчи ва экспортбоп маҳсулотлар ишлаб чиқаришни кенгайтириш ишларини ташкил этиш;
• электротехника саноати тармоғига, шу жумладан маҳсулотлар ишлаб чиқаришнинг технологик жараёнларига инновацион ишланма ва технологиялар жорий этилишини таъминлаш;

«Йўл харитаси»да назарда тутилган тадбирларнинг ўз вақтида, тўлиқ ва сифатли амалга оширилиши юзасидан тизимли мониторинг ўрнатиш;

ҳар ўн беш кунда амалга оширилаётган лойиҳаларнинг ҳолати ва «Йўл харитаси»нинг бажарилиши юзасидан Вазирлар Маҳкамасига ахборот киритиб бориш.

Шундай тартиб ўрнатиладики, унга мувофиқ 2019 йил 1 июлдан бошлаб:

а) электротехника ва электромаиший маҳсулотларнинг давлат харидлари, шу жумладан давлат харидлари стратегик субъэктлари томонидан амалга оширилишида маҳаллий ишлаб чиқарувчиларга нисбатан 20 фоизгача нарх преференцияси қўлланилади;

б) Давлат бюджети маблағлари ҳисобидан объэктларни «тайёр ҳолда топшириш» шартлари асосида қуриш ёки реконструкция қилиш бўйича тендер ҳужжатларида пудратчи томонидан республикада ишлаб чиқарилиши йўлга қўйилган электротехника ва электромаиший маҳсулотлар сотиб олиш назарда тутилади;

в) электротехника саноати тармоғи корхоналари томонидан:

ўзлари ишлаб чиқарган электротехника ва электромаиший маҳсулотларни экспорт қилиш операциялари бўйича муддати ўтказиб юборилган дебитор қарздорлик ҳосил бўлишини ҳисоблашнинг ягона муддати божхона юк декларацияси расмийлаштирилган санадан бошлаб 180 кун этиб;

ўзларининг ишлаб чиқариш эҳтиёжлари учун технологик ускуналарни республикага олиб кириш ва «эркин муомалага чиқариш (импорт)» божхона режимига расмийлаштириш ёки импорт контрактлари бўйича улар учун тўланган пул маблағларини қайтариш муддати импорт контрактлари бўйича тўлов амалга оширилган кундан бошлаб 270 кун этиб белгиланади;

г) кредит суммаси ва валюта туридан қатъий назар электротехника саноати тармоғи корхоналари томонидан республикада ишлаб чиқарилмайдиган электротехника ва электромаиший маҳсулотлар ишлаб чиқариш бўйича лойиҳаларни амалга ошириш учун маҳаллий тижорат банкларидан олинадиган кредитларнинг эквиваленти 1 млн АҚШ долларидан ошмаган қисми бўйича фоиз харажатлари Ўзбекистон Республикаси Вазирлар Маҳкамаси ҳузуридаги Тадбиркорлик фаолиятини ривожлантиришни қўллаб-қувватлаш давлат жамғармаси маблағлари ҳисобидан тижорат банклари томонидан белгиланган фоиз ставкасининг 50 фоизи миқдорида, лекин кредит ставкасининг 5 фоизлик пунктидан ошмаган миқдорда икки йил мобайнида қопланади.

Ўзбекистон Республикаси Молия вазирлиги, Иқтисодиёт ва саноат вазирлиги ҳамда «Ўзелтехсаноат» уюшмасининг Ўзбекистон Республикаси Президентининг 2017 йил 13 февралдаги ПҚ–2772-сон қарорига мувофиқ ташкил этилган «Ўзелтехсаноат» уюшмасининг Электротехника саноатини ривожлантириш жамғармасининг маблағларини шакллантириш манбалари этиб қуйидагиларни белгилаш тўғрисидаги таклифи қўллаб-қувватланди:

Ўзбекистон Республикаси Давлат бюджетидан ажратиладиган маблағлар;

халқаро молия институтлари ва бошқа хорижий донорлар грантлари, шунингдек қонун ҳужжатларида тақиқланмаган бошқа манбалар.

Ўзбекистон Республикаси Молия вазирлиги Жамғарма ҳисоб рақамига 2019—2020 йилларда тенг улушларда 20 миллиард сўм миқдорида маблағ ўтказиб берилишини таъминлайди.

Белгиланишича, Ўзбекистон Республикаси Давлат бюджетидан Жамғармага ажратиладиган маблағлар қуйидаги мақсадлар учун сарфланади:

• илмий-тадқиқот ва тажриба-конструкторлик ишланмаларни молиялаштириш учун республикадаги илмий-тадқиқот муассасаларига ва электротехникасаноати тармоғи корхоналарига грантлар ажратиш;
• электротехника ва электромаиший маҳсулотлар ишлаб чиқарувчи маҳаллий корхоналарда халқаро стандартларни жорий этиш, маҳсулотларни чет эл бозорлари талабларига мувофиқ сертификатлаштириш тадбирлари билан боғлиқ харажатларнинг 50 фоизини, лекин битта ҳолат бўйича эквиваленти 20 минг АҚШ долларидан кўп бўлмаган миқдорда қоплаш;
• стартап-лойиҳаларини молиялаштириш, электротехника саноати тармоғида ишлаб чиқариш ва хизмат кўрсатиш корхоналарининг устав фондларини (капиталларини) шакллантиришда иштирок этиш, махсус инжиниринг марказлари ва тажриба-конструкторлик бюроларини ташкил этиш;
• электротехника ва электромаиший маҳсулотлар ишлаб чиқариш бўйича инвестиция лойиҳаларини амалга ошириш учун салоҳиятли инвесторларни жалб қилиш мақсадида бўш турган ва фойдаланилмаётган бино-иншоотларни таъмирлаш ва реконструкция қилиш ҳамда улардаги ташқи муҳандислик-коммуникация тизимларини яхшилаш;
• электротехника ва электромаиший маҳсулотлар ишлаб чиқарувчи маҳаллий корхоналарга тендер савдоларида иштирок этиш учун қисқа муддатга молиявий кафилликлар бериш;
• электротехника саноати тармоғи корхоналарининг халқаро кўргазмалар ва ярмаркаларда иштирок этиши билан боғлиқ харажатларининг 50 фоизини, лекин битта ҳолат бўйича эквиваленти 10 минг АҚШ долларидан кўп бўлмаган миқдорда қоплаш;
• маҳаллий электротехника ва электромаиший маҳсулотларни илгари суриш бўйича республикада ва хорижий давлатларда кўргазма ва ярмаркалар ташкил этиш, семинарлар ўтказиш, тақдимот материаллари ва кўргазма стендларини тайёрлаш.

Ўзбекистон Республикаси Вазирлар Маҳкамаси бир ой муддатда электротехника саноатини жадал ривожлантириш дастури ишлаб чиқилиши ва тасдиқланишини таъминлайди. Унда 2019–2022 йилларда:

• тармоқда мисни қайта ишлаш ҳажмини 5 баравар ошириш;
• электротехника ва электромаиший маҳсулотлар ишлаб чиқариш ҳажмини 2 баравар ошириш;
• электротехника ва электромаиший маҳсулотлар экспорти ҳажмини 4 баравар ошириш;
• амалга оширилаётган ва истиқболли инвестиция лойиҳалари доирасида камида 15 та янги турдаги маҳсулотлар ишлаб чиқаришни ўзлаштириш назарда тутилади.

«Ўзелтехсаноат» уюшмаси таркибига кирувчи корхоналар 2022 йил 1 январга қадар муддатга белгиланган тартибда шакллантириладиган рўйхатлар бўйича ўзларининг ишлаб чиқариш эҳтиёжлари учун олиб келинадиган, Ўзбекистон Республикасида ишлаб чиқарилмайдиган хом ашё, материаллар, бутловчи қисмлар ва асбоб-ускуналар бўйича божхона божлари тўлашдан озод этилди.