Ўзбекистон Президенти Шавкат Мирзиёев 31 май куни Грузия, Америка Қўшма Штатлари ва Корея Республикасининг элчилари этиб тайинланган Зураб Абдушелишвили, Даниэл Розенблюм ва Кан Чже Квондан ишонч ёрлиқларини қабул қилди, деб хабар берди Президент матбуот хизмати.
Давлат раҳбари элчиларни мамлакатдаги дипломатик миссиясини бошлагани билан самимий табриклаб, уларга ушбу шарафли ва масъулиятли вазифада муваффақиятлар тилади.
Кейинги йилларда мамлакат хорижий шериклар билан ўзаро манфаатли ҳамкорликни кенгайтиришга қаратилган фаол ташқи сиёсат олиб бораётгани алоҳида таъкидланди.
Марказий Осиё ва МДҲ давлатлари, Америка, Евроосиё ва Африканинг етакчи мамлакатлари билан муносабатлар мустаҳкамланиб, амалий ҳамкорлик тобора фаоллашаётгани бундан далолат беради.
Бундан ташқари, «йўл хариталари» асосида нуфузли халқаро ташкилотлар ва минтақавий тузилмалар билан узоқ муддатли шериклик алоқалари кенгаймоқда.
Президент ўз нутқида янги элчилар вакиллик қилаётган давлатлар билан кўп қиррали ҳамкорликнинг истиқболларига тўхталиб ўтди.
Ўзбекистон билан Грузия ўртасидаги, аввало сиёсий, савдо-иқтисодий ва маданий-гуманитар соҳалардаги муносабатлар ривожланиб бораётгани мамнуният билан қайд этилди. Кейинги йилларда парламентлараро алоқалар ҳам фаоллашди.
Грузия билан товар айирбошлашни кўпайтириш, саноат, транспорт, логистика ва туризм соҳаларида кооперацияни кучайтиришга қаратилган аниқ лойиҳаларни илгари суриш муҳимлиги таъкидланди.
Давлат раҳбари Ўзбекистон Республикаси ва Америка Қўшма Штатларининг дўстлик ва ҳар томонлама ҳамкорлик руҳидаги икки томонлама муносабатларида юксак даражага эришилганини юқори баҳолади.
Ўтган йил май ойида АҚШга амалга оширилган олий даражадаги тарихий ташриф мамлакатлар стратегик шериклигида янги босқични бошлаб берди.
Бугун барча даражалардаги мулоқот ва алмашинувлар фаоллашгани кузатилмоқда. АҚШ савдо вазири Уилбур Росс, конгрессменлар Трент Келли ва Висенте Гонсалес, Миссисипи штати губернатори Филипп Брайант ва бошқалар бошчилигидаги юқори даражадаги делегацияларнинг мамлакатга ташрифлари самарали бўлди.
Американинг етакчи компания ва банклари билан ўзаро манфаатли ҳамкорлик кенгаймоқда, маданий-гуманитар алоқалар мустаҳкамланмоқда, фуқаролик жамиятини ривожлантириш ва инсон ҳуқуқларини таъминлаш соҳасида, шунингдек, халқаро ва минтақавий аҳамиятга молик долзарб масалалар бўйича конструктив мулоқот амалга оширилмоқда.
Давлат раҳбари Корея Республикаси билан муносабатларда алоҳида стратегик шерикликка эришилганини катта мамнуният билан қайд этди.
Жанубий Корея Президенти Мун Чже Иннинг ўтган ойда Ўзбекистонга давлат ташрифи икки томонлама муносабатларни янада юксак босқичга олиб чиқиб, уларни янги амалий мазмун билан бойитди.
Ўзбекистон Корея Республикаси раҳбариятининг Корея яриморолида тинчлик ва барқарорликни мустаҳкамлаш борасидаги изчил сиёсатини қатъий қўллаб-қувватлаётгани таъкидланди.
Эришилган келишувларни амалга ошириш, инновация ва инвестициялар, транспорт ва коммуникациялар, инфратузилмани модернизация қилиш, таълим, соғлиқни сақлаш, маданият ва бошқа йўналишларда қўшма дастур ва лойиҳаларни ўз вақтида тайёрлаш ва сифатли рўёбга чиқариш масалаларига алоҳида эътибор қаратилди.
Президент янги тайинланган элчилар фаол дипломатик фаолияти билан мамлакатлар ўртасидаги дўстона муносабатлар, шериклик ва кўп қиррали ҳамкорликни мустаҳкамлашга муносиб ҳисса қўшишларига ишонч билдирди.
Ўз навбатида, элчилар давлат раҳбарига самимий қабул учун яна бир бор миннатдорлик билдириб, мамлакатлар ва халқ фаровонлиги йўлида самарали давлатлараро муносабатларни изчил ривожлантиришга бор куч-ғайратини сафарбар қилишини қайд этди.
Изоҳ (0)