Мажбурий ижро бюроси ижтимоий тармоқларда Caravan Group МЧЖ ресторанлари билан боғлиқ вазият борасида тарқалган маълумотга расмий муносабат билдирди. Бу ҳақда «Дарё» га Мажбурий ижро бюроси матбуот хизмати маълум қилди.
Тошкент туманлараро иқтисодий судининг қарорига асосан қарздор «Kreative Studio Caravan» МЧЖ, «Протект Консалт» МЧЖ, Caravan Group МЧЖ ва «Караван Арт» МЧЖлардан (тадбиркор Тимур Мусинга тегишли корхоналар) АТ «Асакабанк» фойдасига жами 15,5 миллиард сўм, АТБ «Капитал банк» фойдасига 3,7 миллиард сўм ва давлат фойдасига 77,2 миллион сўм ундириш, кредит қарздорлиги бўйича ундирувни жами баҳоси 21,6 милиард сўмга тенг гаровда бўлган: Мирзо Улуғбек тумани, Шўртепа кўчаси 253-уй, Яккасарой тумани А.Қаҳҳор кўчаси 25-уй, Тошкент вилояти, Бўстонлиқ тумани, Хўжакент мавзеси ҳамда Хўжакент ҚФЙ ҳудудида жойлашган бино-иншоотларга қаратиш белгиланган.
Ижро ҳужжатлари бўйича тегишли тартибда ижро ишлари қўзғатилиб, қарздор корхоналарга ижро ҳужжати талабларини бажариш учун 15 кунгача бўлган ихтиёрий муддатлар белгиланган ва қарор нусхалари тегишли тартибда корхона раҳбарларига топширилиб, улар хабардор қилинган. Шунингдек, ижро ҳаракатлари ҳақида шахсан Тимур Мусинга ҳам МИБ ходимлари томонидан тушунтириш берилган.
Қарздорлар томонидан ижро ҳужжатлари талаблари ихтиёрий бажарилмаганлиги сабабли давлат ижрочиси томонидан мажбурий ижро ҳаракатлари олиб борилган. Қарздор корхона раҳбарининг Бюро ходимлари ҳаракатларига эътироз билдириши ўринсиз. Мажбурий ижро Бюроси мазкур қарздор корхонага нисбатан ижро ҳаракатларини фақатгина суд қарори ижросини қатъий таъминлаш доирасида амалга оширмоқда.
Мажбурий ижро ҳаракатлари давомида Яккасарой тумани А.Қаҳҳор кўчаси 25-уй (Chelsea АRMS, баҳоси 4 млрд. сўм) ҳамда Тошкент вилояти, Бўстонлиқ тумани, Хўжакент мавзесида жойлашган (Chinar’s, 6 млрд. сўм) бино иншоотлар хатланиб, қарздор корхона раҳбарларига тегишли тартибда хабарнома юборилган ҳолда жорий йилнинг 14 май санасида электрон онлайн-аукцион савдоларига чиқарилган. Ушбу кўчмас мулкларнинг аукцион савдолари жорий йилнинг 13 ва 14 июнь кунлари ўтказилиши белгиланган.
Изоҳ (0)