Россия президенти Владимир Путин рейтингининг тушиб кетишига сабаб — россияликлар яшаш шароитлари яхшиланишига ишонмаслигида. Бу ҳақда Бутунроссия жамоатчилик фикрини ўрганиш маркази раҳбари Валерий Федоров «Дожд» телеканалига берган интервьюсида маълум қилди, деб хабар беради «Ведомости».
«Ўйлашимча, асосий сабаб бу — қачон яхшироқ яшашимизни тушунмаслигимизда. Яхши яшаш нима дегани? Бу даромадларимиз қачон ошади дегани. Статистикачиларнинг маълумотига кўра, ҳозирда кўпчилик уларга ишонмайди — сўнгги беш йилда даромадларимиз ортмади. Асосий муаммо — одамлар эртанги кунимиз бугунгидан яхши бўлишига ишонмаслигида», — дейди Федоров.
Шунингдек, Валерий Федоров пенсия ислоҳоти ҳақида ҳам тўхталиб ўтди.
«Эртага кўпроқ пул ишлаб топамиз, тиббиётимиз, таълим даражамиз яхши бўлади, ижтимоий таъминотимиз такомиллашади деб ҳисоб-китоб қилгандик. Бироқ буларнинг барчаси кутганимиздек бўлиб чиқмади. Бизга келажакда ҳам шу ойлик учун кўпроқ ишлашимизни кўрсатиб беришди», — дейди эксперт.
24 май куни Бутунроссия жамоатчилик фикрини ўрганиш маркази сиёсатчиларга бўлган ишонч борасида ўтказилган сўров натижаларини эълон қилганди. Сўров иштирокчиларининг 31,7 фоизигина Путинга ишонч билдирган, бу эса 2006 йилнинг январидан буён энг паст кўрсаткич ҳисобланади.
2018 йилнинг май ойида ўтказилган худди шу турдаги сўровда Путин 47,4 фоиз овоз тўплаганди. Россия президентининг рейтинги 2018 йилнинг июнидан, пенсия ёшини кўтариш ҳақида эълон қилганидан буён тушмоқда.
Изоҳ (0)